दाहाल गुटकाे अनुशासनहीनता, केन्द्रीय कार्यालय र पार्टी लाेगाेकाे चरम दुरुपयोग
पुष्पकमल दाहाल प्रचण्डले २०७७ कात्तिक २८ गते पार्टी सचिवालयकाे बैठकमा स्वेच्छाचारी रूपमा बाँड्नु भएकाे निजी प्रस्ताव पार्टी केन्द्रीय कार्यालयकाे नाममा प्रकाशन गरी देशभरि वितरण गर्नुभएको छ । याे पार्टीकाे लाेगाे र केन्द्रीय कार्यालयकाे अनधिकृत दुरूपयाेग हाे । र, पार्टी विधान, निर्णय, प्रक्रिया र पद्धतिकाे गंभीर उल्लंघन र अनुशासनहीनता समेत हाे ।
केन्द्रीय कार्यालयका दुवै जना सचिवहरू – ईश्वरी रिजाल र श्रीराम ढकाललाई टेलिफोन गरी बुझ्दा उहाँहरुले आफूहरूलाई कुनै जानकारी नै नभएकाे बताृनुभयाे। यसरअं यो पार्टी केन्द्रीय कार्यालय र पार्टीको लोगोको अनधिकृत प्रयाेग र स्वेच्छाचारी दुरुपयोग गरेर छापिएको छ ।
केन्द्रीय प्रचार तथा प्रकाशन विभागका उपप्रमुख सूर्य थापाले पार्टीका केन्द्रीय सामग्रीहरुको प्रकाशनको सन्दर्भमा हाम्रो पनि संलग्नता र सरोकार रहन्छ, तर यसमा कुनै जानकारी छैन। त्यसैले यो अनधिकृत, गैरजिम्मेवार, अनैतिक, गुटबन्दीपूर्ण र स्वेच्छाचारी क्रियाकलाप हो भन्ने स्पष्ट गर्नुभयाे ।
पार्टीले यसरी प्रकाशन र बहस संचालनकाे कुनै निर्णय पार्टीले गरेकाे छैन । हालसम्म याे प्रस्ताव पार्टी सचिवालयमा दर्जसमेत भएकाे जानकारी छैन । केवल अर्का अध्यक्ष पुष्पकमल दाहालले मनाेमानीपूर्ण ढंगले बाँडेर अखबारबाजी गराउनु भएको मात्रै हाे । त्यत्तिकै आधारमा प्रकाशन र वितरण गरिनु हदैसम्मको अनुशासनहीनता र अराजकता हाे । यसमा पार्टी विधानअनुरूप आवश्यक कारबाही गरिनुपर्छ ।
