नेकपा फुट्ला त ? यस्तो छ उर्दि
नेकपाभित्रको तनावलाई लिएर बिभिन्न अड्कलबाजी भइरहेको बेला आज एकैदिन पार्टीको सचिवालय र मन्त्रिपरिषद्को बैठक बस्दैछ । एक घण्टाको फरकमा बस्न लागेको बैठकलाई लिएर बिभिन्न आशंकाहरु भइरहेका छन् ।
यद्यपि आज दिउँसो एक बजेका लागि बोलाइएको मन्त्रिपरिषद् बैठक २ बजेलाई सारिएको हो । सचिवालय बैठकसँग जुधाएर राखेको सन्देश जाने भएपछि प्रधानमन्त्रीले १ घण्टा बैठक पर सारेको स्रोतले बतायो ।
पूर्वनिर्धारित समय अनुसार, आजै १ बजे नेकपा सचिवालय बैठक बालुवाटारमै बस्ने प्रवक्ता नारायणकाजी श्रेष्ठले जानकारी दिएका छन् ।
नेकपाका कार्यकारी अध्यक्ष प्रचण्डसहित पाँच नेताहरु प्रधानमन्त्री एवं अध्यक्ष केपी शर्मा ओलीलाई बैठकबाट दबाब दिने दाउमा छन् । सकभर ओलीलाई प्रधानमन्त्री वा पार्टी अध्यक्षमध्ये एक पदमात्रै रोज्न दिने गरी उनीहरुले दबाब सिर्जना गरिरहेका छन् ।
यता, प्रधानमन्त्री ओली भने कुनै पनि हिसाबले पछि नहट्ने अबस्थामा छन् । उनले पार्टी बैठकबाट आफूविरुद्ध निर्णय भए अर्को ठूलो कदम चाल्ने चेतावनी दिइसकेका छन् ।
आजको बैठकबाट नेकपा फुटको दिशामा जान सक्ने भन्दै नेताहरुले चिन्ता व्यक्त गरिरहेका छन् । दुई अध्यक्षबीच सहमति नभए नेकपा फुटको नजिक देखिएको स्रोतले बतायो । नेकपाभित्र पूर्वएमालेहरुको झगडाले फुटको अबस्था निम्त्याएको हो । पूर्वएमालेको झगडामा कार्यकारी अध्यक्ष प्रचण्डले खेल्दै प्रधानमन्त्रीलाई अप्ठेरो पार्ने काम गरिरहेको आरोप लाग्दै आएको छ ।
