मलाई आफ्नैले काम गर्न दिएनन् : प्रधानमन्त्री ओली
प्रधानमन्त्री केपी शर्मा ओलीले पार्टी भित्रको लफडाले गर्दा सरकारको काममा पुरा समय खर्च गर्न नसकेको बताउनु भएको छ । उहाले देशको विकासको कुराभन्दा अनावश्यक लफडाको जवाफ दिनुपरेको भन्दै असन्तुष्टि व्यक्त गर्नुभएको छ ।
देश कोरोना महामारीबाट ग्रस्त भईरहेका बेला सत्तारुढ नेपाल कम्युनिष्ट पार्टी भित्र भईरहेको विवादलाई लिएर विभिन्न टिकाटिप्पणी भईरहेका बेला उहाले यस्तो कुरा बताउनु भएको छ । अन्नपूर्ण पोष्टसँगको अन्तर्वार्तामा उहाले तपाईसँग देशको विकासको कुरा भन्दा बढि पार्टी कै लफडाको जवाफ दिनु परेको बताउनु भयो ।
‘आज मैले तपाईंसँगको प्रश्नमा पनि देश विकासको कुराभन्दा अनावश्यक लफडाको जवाफ दिनुपरेको छ । मेरो रुचिको विषय होइन । अहिले वातावरण यस्तो बनाइएको छ कि विषयबाट ध्यान डाइभर्ट गरिदिएको, अन्यत्र मोडिदिएको छ । जसले गर्दा विषयतर्फ होइन, गैरविषयतर्फ, अनुचित विषयमा हामी समय बर्बाद गरिरहेका छौं’, उहाले भन्नुभयो ।
प्रधानमन्त्री ओलीले सरकारका काममा आफुले समय पुरै दिनुपर्नेमा आधा समय अनावश्यक ढंगले खर्च गर्नुपरेको बताउनु भयो । ‘अनावश्यक ढंगले यो बैठक भनेको छ, भेटघाट भनेको छ, मैले किन भेट्न पाइनँ भनेको छ । निहुँ खोजेको छ । सरकारका काममा मैले समय पूरै दिनुपर्नेमा आधा समय अनावश्यक ढंगले खर्च गर्नुपरेको छ । लफडामा खर्च गर्नुपरेको छ । जवाफ दिनुपरेको छ’, उहाको भनाई छ ।
