ओलीको विकल्प छैन : कमल थापा
राष्ट्रिय प्रजातन्त्र पार्टीका अध्यक्ष कमल थापाले केपी ओलीको ठाउँमा पुष्पकमल दाहाल प्रचण्ड, माधव नेपाल वा शेरबहादुर देउवा आए पनि देशले संकटबाट निकास नपाउने बताएका छन् ।
सामाजिक सञ्जाल ट्वीटरमा मंगलवार एक सन्देश लेख्दै अध्यक्ष थापाले नेकपा भित्रको विवादप्रति लक्षित गर्दै ओलीको विकल्पमा अरुलाई ल्याउँदैमा निकास नआउने दावी गरेका हुन् । उनले नेकपाको ठाउँमा नेपाली कांग्रेस वा अन्य कुनै दललाई स्थापित गरेर देशले संकटबाट समाधान नगर्ने बताए ।
‘समस्याको चक्रब्यूहबाट देशलाई मुक्त तुल्याउन मार्गचित्र र अवधारणामा सुधार नगरेसम्म कस्मेटिक परिवर्तनको कुनै अर्थ रहँदैन । केपी ओलीको ठाउँमा प्रचण्ड, माधव नेपाल वा शेरबहादुर देउवा ल्याएर अथवा नेकपाको ठाउँमा नेपाली कांग्रेस वा अन्य कुनै दललाई स्थापित गरेर देशले संकटबाट निकास पाउँदैन,’ थापाले लेखेका छन् ।
भ्रष्टाचारदेखि राज्यसत्ता कब्जा गर्ने कार्यमा सत्तारुढ र प्रमुख प्रतिपक्ष दल दुवैले साझेदारी र भागवण्डा कायम गरेको भन्दै थापाले आलोचना गरेका छन् ।
‘समस्याको चक्रव्युहबाट देशलाई मुक्त तुल्याउन मार्गचित्र र अवधारणामा सुधार नगरेसम्म ‘कस्मेटिक’परिवर्तनको कुनै अर्थ रहँदैन । नेपाली जनताले मुलुकको राजनीतिक मार्गचित्र र गन्तव्यका वारे पुनर्विचार गर्नु जरुरी भएको छ । धर्मनिरपेक्षता, गणतन्त्र र संघीयताको विकल्प खोज्ने वा उल्लेखित मान्यता बारे जनताको प्रत्यक्ष अभिमत बुझ्न जनमतसंग्रह गर्ने बारे अब राष्ट्रिय बहस प्रारम्भ गरिनुपर्छ,’ अध्यक्ष थापाको भनाई छ ।
