जुवाबाट लाखौं असुल्दै प्रहरी
कोरोना महामारीको बेलामा पनि जुवा खालहरु बन्द भएका छैनन् । दशैं सुरु भएपछि विभिन्न जिल्लामा जुवाडे पक्राउ गर्ने क्रम बढेको छ ।
तर, कतिपय सहरमा भने प्रहरीकै संरक्षणमा ठूला जुवाखाल चलिरहेका छन् । खासगरी पेशेवेर जुवाडेले प्रहरीसँग सेटिङ मिलाएर धन्दा चलाइरहेका छन् । त्यस्ता पेशेवरमध्ये एक हुन् बाँके खजुरा गाउँपालिका वडा नम्बर १ का वडा अध्यक्ष सुमन मल्ल । उनले जुवाकै धन्दाबाट करोडौं कमाएको स्रोत बताउँछ ।
कुनै समय निम्न आर्थिक अवस्था भएका उनले अहिले नेपालगञ्जको स्नेहा होटलको मिनीक्यासिनोमा समेत लगानी गरेका छन् । त्यस्तै काठतस्करी र अवैध क्रसरमा पनि उनले लगानी गरेका छन् । उनको मुख्य आम्दानीको स्रोत भनेको जुवाबाट आर्जित अवैध धन नै हो ।
बिनोद खड्का, दीपक थापामगरलगायतसँग मिलेर उनीहरुले नेपालगञ्जको भृकुटीनगरमा जुवा खेलाउने गर्दछन् । नेपालगञ्जकै ठूला व्यापारीहरु आउने सो जुवामा दिनमै करोडको हारजित हुने गरेको छ । मल्लले मिटरब्याजमा पैसा लगाएर दिनमै लाखौं कमाउने गरेको स्रोत बताउँछ । सो समूहमा मोहित शाह र हलिम साहसमेत संलग्न रहेको स्रोत बताउँछ । उनीहरुको अड्डामा जुवा खेल्न दाङ, बर्दिया तथा कैलालीका व्यापारीहरु समेत आउने गर्दछन् ।
प्रहरीसँग सेटिङ भएकाले पक्राउ नपर्ने हुँदा ठूला व्यापारीहरु उनीहरुको जुवाखालमा जम्मा हुने गरेका छन् । बेला बेला जुवा अखडा परिवर्तनसमेत गर्दै आएको स्रोत बताउँछ ।
नेपालगञ्जमा जुनसुकै एसपी आएपनि उनीहरुले सेटिङ मिलाउने गर्दछन् । अहिलेका एसपी ओम रानासँग समेत सेटिङ भइसकेको स्रोत बताउँछ । जिल्ला प्रहरी कार्यालय, बाँकेका इन्सपेक्टर सुरजजंग क्षेत्री तथा सई माधव रिजालमार्फत उनीहरुले सेटिङ मिलाएका हुन् । वडा प्रहरी कार्यालयका हालै सरुवा भएका इन्सपेक्टर डिल्ली बहादुर खड्कालाई समेत उनीहरुले हात लिइसकेका छन् । प्रहरीलाई नै मासिक १० लाखसम्म उनीहरुले खर्च गर्ने स्रोत बताउँछ । जसमध्ये पाँच लाख एसपीलाई दिने गर्दछन् । तीन लाख घुमुवालाई र दुई लाख वडा प्रहरी कार्यालयका प्रहरीलाई बुझाउने गर्दछन् । जसकारण घुमुवाहरु नै उनीहरुको सेन्ट्री बस्ने गरेका छन् । स्रोतका अनुसार उनीहरुले प्रदेश डिआईजी रबिन्द्र धानुकसँग समेत सेटिङ मिलाउने प्रयास गरिरहेका छन् ।
