कर्णाली प्रदेशका मुख्यमन्त्री शाहीको पद धरापमा
कर्णालीका मुख्यमन्त्री महेन्द्रबहादुर शाहीको पद धरापमा परेको छ । आफ्नै पार्टीका १८ जना सांसदहरुले अविश्वास प्रस्ताव दर्ता गरेपछि शाहीको पद धरापमा परेको हो ।
नेपाल कम्युनिष्ट पार्टी ‘नेकपा’ को संसदीय दलका नेता समेत रहेका शाहीविरुद्ध कर्णाली प्रदेशसभामा रहेका नेकपाका ३३ जना सांसदमध्ये १८ जनाले अविश्वासको प्रस्ताव बुझाएका हुन् । तत्कालीन माओवादी पक्षका शाही विरुद्ध तत्कालीन एमाले पक्षका सांसद यामलाल कँडेलको नेतृत्वमा १८ जना सांसदले हस्ताक्षर गरी संसदीय दलका प्रमुख सचेतक गुलावजंग शाहलाई बुझाएका छन्।
हस्ताक्षर गर्नेमा पूर्व माओवादी पक्षका ५ जना सांसद रहेका छन् भने १३ जना पूर्व एमाले पक्षका रहेका छन्। अब संसदीय दलमा बाँकी रहेकामध्ये पूर्व एमालेका ५ जना र पूर्व माओवादीका १० जना छन्। पूर्व एमालेमध्येका एक जना सांसद राजबहादुर शाही भने प्रदेश सभामुख हुन्।
अविश्वासको प्रस्ताव दर्ता गराउनेहरुमा पूर्वमन्त्री यामलाल कँडेल, प्रदेश सरकारकी उपसभामुख पुष्पा घर्तीमगर र नेकपाका कर्णाली प्रदेशका संसदीय दलका प्रमुख सचेतक गुलाबजङ शाह,धर्मराज रेग्मी लगायत रहेका छन् । मुख्यमन्त्रीका दाबेदार रहेका पूर्वएमाले नेता यमलाल कँडेल र मुख्यमन्त्री शाहीबीच सुरूदेखि नै खटपट भइरहेको थियो। कर्णाली प्रदेशमा सत्ता पक्षकै सांसदहरु मुख्यमन्त्री शाहीको कार्यशैलीप्रति असन्तुष्ट थिए ।
