एक दलित युवकको मृत्यु भएपछि रौतहटमा आन्दोलन
रौतहटमा प्रहरी हिरासतमा रहेका एक दलित युवकको मृत्यु भएपछि स्थानीयले आन्दोलन सुरु गरेका छन् ।
प्रहरीको ज्यादती बढेको भन्दै हजारौंको संख्यामा पुगेका स्थानीयले ईलाका प्रहरी कार्यालय गरुडा घेराउ गरेका छन । प्रहरी हिरासतमा कुटपिट गर्ने दोषि प्रहरीलाई कारबाहीको माग राख्दै ठुलो संख्याका स्थानीयबासिन्दा र दलित समुदाय आन्दोलित भएका छन ।
गत साउन ३१ गते गरुडा नगरपालिका–८ जिगडियाका १७ वर्षीय निरन्जन रामको घाँटी रेटी हत्या भएपछि प्रहरीले घटनामा संलग्न सात जनालाई पक्राउ गरेको थियो । तीनैमध्येका एक विजय महरा (चमार) लाई यातना दिदाँ अस्वस्थ भई अस्पतालमा उपचारको क्रममा मृत्यु भयो ।
आर्थिक चलखेल गरेर प्रहरीले निर्दोष रहेका विजय रामलाई पक्राउ गरेको भन्दै यस अघिदेखि नै दलित अगुवा तथा स्थानीयले नारा जुलुस सहित विरोध गर्दै आएका थिए । उनै निर्दोष भनिएका १९ वर्षीय विजय राम महराको प्रहरीको कुटपिट बाट मृत्यु भएकोपछि दलित समुदाय, स्थानीयबासिन्दा र अधिकारकर्मीहरुले ईलाका प्रहरी कार्यालय गरुडा घेराउ गर्दै नाराबाजी गरेका छन ।
घटनामा संलग्न रहेको स्वीकार गराउन विजय राम महरा लाई प्रहरीले निर्घात कुटपिट गरेको र त्यसैको असर उनको उपचारको क्रममा मृत्यु भएको नीरञ्जन राम हत्याकाण्ड जिल्ला संघर्ष समिति रौतहटले दाबी गरेको छ । आन्दोलनकारीले इलाका प्रहरी कार्यालय गरुडाका डिएसपीले घुस लिएर निर्दोषलाई कुटपिट गरी ज्यान लिएको भन्दै निलम्बन गरी कारवाहीको माग गरेका छन् ।
निरन्जन रामको हत्या भएको भोलिपल्ट ईलाका प्रहरी कार्यालय गरुडाले हत्याको आरोपमा भोलिपल्ट गाउँकै १९ वर्षीय विजय राम महरा सहित ७ जना लाई पक्राउ गरेको थियो । पक्रेको दिनदेखि छोरालाई भेट्न नदिएको प्रहरी हिरासतमा मृत्यु भएका महराका बुवा पनिलाल महराले बताए ।
अस्पताल भर्ना गरेको खबर पाएर जाँदा पनि भेटन नदिएको उनको गुनासो रहेको छ ।
