निगमका कार्यकारी निर्देशक पौडेलले कार्यसम्पादनमा पाए ९२ अंक
नेपाल आयल निगमको कार्यकारी निर्देशक सुरेन्द्रकुमार पौडेलले कुल १ सय अंकभारको कार्यसम्पादन मूल्यांकनमा सर्वोत्कृष्ट ९२ नतिजा प्राप्त गरेका छन् । उद्योग वाणिज्य तथा आपूर्ति मन्त्रालयका सचिव बैकुण्ठ अर्याल संयोजकत्वको कार्यसम्पादन मूल्यांकन समितिले उनको एक वर्षको कार्य प्रगति अध्ययन गरी ९२ अंक दिएको हो ।
डेढ वर्षअघि खुला प्रतिस्पर्धाबाट नियुक्त भएर आयल निगम हाँकिरहेका पौडेलले सुरुदेखि नै सुधारका योजनाहरु लागू गरिरहेका छन् । उनले पाइपलाइन विस्तार, भण्डारण गृह निर्माण, निगमकै स्वामित्वमा ग्यासको बोटलिङ प्लान्ट, नयाँ रिफ्युलटर जडानलगायत काम अगाडि बढाएका छन् । यसअघि पौडेलले उदयपुर सिमेन्ट उद्योेगलाई पनि नाफामा सञ्चालन गरेर कुशल प्रशासकको छवि बनाईसकेका छन् ।
