सोमबारबाट तीन दिनसम्म भारी वर्षाको सम्भावना
सोमबार (भोलि) बाट पुन मनसुन सक्रिय हुने भएको छ । जल तथा मौसम विज्ञान विभागले जारी गरेको विषेश मौसमी बुलेटिन अनुसार मनसुन सक्रिय हुँदा तीन–चार दिनसम्म देशका धेरैजसो स्थानमा हल्कादेखि मध्यम वर्षा हुने अनुमान गरिएको छ । साथै केही स्थानमा भने भारी वर्षाको सम्भावना रहेको विभागले जनाएको छ ।
सोमबार रातिबाट मनसुन न्यून चापीय रेखा नेपालको तराई भूभाग नजिक रहने छ । साथै अरब सागरबाट समेत पर्याप्त जलवाष्पयुक्त हावा भित्रिने सम्भावना देखिएकाले फेरि झरी सुरु हुने विभागले पूर्वानुमान गरेको छ ।
विभागले जारी गरेको विशेष मौसमी बुलेटिनमा भनिएको छ, ‘नेपालको तराई भू-भाग नजिक रहने तथा अरब सागरबाट समेत पर्याप्त जल वाष्पयुक्त हावा भित्रिने सम्भावना देखिएकोले आउँदो सोमबार (साउन १२) रातीबाट ३/४ दिनसम्म नेपालमा मनसुन सक्रिय भै देशको धेरै जसो स्थानहरुमा हल्का देखि मध्यम बर्षा र केहि स्थानहरुमा भारी बर्षा हुन सम्भावना रहेको छ।’
विभागले नदी र खोलामा पानीको बहाव बढ्ने, पहाडी क्षेत्रमा भूक्षय हुने, पहिरो जाने, सडक तथा हवाई यातायात प्रभावित हुन सक्ने समेत अनुमान गरेको छ । साथै ढल र पानीको राम्रो निकास नभएको ठाउँमा डुबानसमेतको जोखिम रहनसक्ने भएकाले सतर्कता अपनाउन मौसम विज्ञान विभागले सबैमा अपिल समेत गरेको छ ।
यस्तो छ, विशेष मौसमी बुलेटिन:
विभागले आगामी तीन दिनको मौसम पूर्वानुमान भनेर साउन १० गते जारी गरेको बुलेटिन अनुसार आइतबार (आज) भने देशभर आंशिकदेखि सामान्य बदली रही केही स्थानहरुमा हल्कादेखि मध्यम वर्षाको सम्भावना रहेको छ । आजराति प्रदेश १ र सुदूर पश्चिम प्रदेशका एक–दुई स्थानमा मेघगर्जन र चट्याङ्सहित भारी वर्षाको समेत सम्भावना रहेको महाशाखाले जनाएको छ ।
यस्तै विभागले सोमबार पनि देशभर सामान्य बदली रही केही स्थानहरुमा हल्का देखि मध्यम वर्षाको सम्भावना रहेको जनाएको छ। प्रदेश १, प्रदेश २ र गण्डकी प्रदेशका एक वा दुई स्थानमा मेघगर्जनरचट्याङ्ग सहित भारी वर्षाको समेत सम्भावना रहेको विभागको अनुमान रहेको छ।
यस्तो छ, आगामी तीन दिनको मौसम:
