राप्रपा कांग्रेसमा विलय भयो, सुनील थापा सहमहामन्त्री
स्थापनाकालदेखि नै टुटफुटका दर्जनौ श्रंखला पार गर्दै आएको राष्ट्रिय प्रजातन्त्र पार्टी (राप्रपा) फेरी चोइटिएको छ । पूर्वमन्त्री सुनीलबहादुर थापाले शनिवार औपचारिकरुपमा राप्रपा चोइट्याएका छन् । थापासहित ३० राप्रपाका नेताहरु प्रमुख प्रतिपक्ष दल नेपाली कांग्रेसमा प्रवेश गर्ने तयारी गरेका छन् ।
थापालाई नेपाली कांग्रेसमा ल्याउन सभापति शेरबहादुर देउवाले लामो समयदेखि प्रयास गरेका थिए । अन्तः उनको प्रयास सफल भएको छ । राप्रपा चोइट्याएर कांग्रेसमा प्रवेश गरेलगतै उनलाई सहमहामन्त्री बनाउने तयारी देउवाले गरेका छन् ।
उनीसहित आएका केन्द्रीय सदस्य र अन्य नेताहरुको पनि केन्द्रीय समिति, प्रदेश समितिमा ब्यवस्थापन गर्ने तयारी नेपाली कांग्रेसले गरेको छ । राप्रपा एकता भएदेखि थापाले असन्तुष्टी पोख्दै आएका थिए । विशेष गरी पार्टी अध्यक्ष कमल थापासँग उनको सम्बन्ध राम्रो बन्न सकेको थिएन ।
थापालाई कांग्रेसमा भित्राउन गोप्य सम्वाद टोली गठन भएको थियो । उपाध्यक्ष विमलेन्द्र निधिको नेतृत्वमा समिति बनेको थियो । थापालगायत समुहलाई कांग्रेसमा ल्याउन देउवाले निधिलाई जिम्मा लगाएका थिए ।
