खुमलटारमा पूर्वमाओवादी नेताको भेलामा चर्चाबीच
सत्तारुढ नेपाल कम्युनिस्ट पार्टी (नेकपा) का अध्यक्ष पुष्पकमल दाहाल (प्रचण्ड)ले आफूनिकट नेताहरूसँग छलफल गरेका छन्। सोमबार खुमलटारस्थित निवासमा प्रचण्डले पूर्वमाओवादीतर्फका स्थायी कमिटी सदस्यहरूसँग छलफल गरेका हुन् ।
अर्का अध्यक्ष केपी शर्मा ओलीले मंसिरमा महाधिवेशन गर्ने प्रस्ताव गरेका छन् । प्रचण्डले यसमा सहमति जनाएको चर्चा चलेपछि उनीनिकट स्थायी कमिटी सदस्यहरू असन्तुष्ट रहेको बताइन्छ ।
‘ओलीसँग सहमति भएको भनिएको विषयमा केही साथीले संशययुक्त प्रश्न उठाएपछि उहाँ (प्रचण्ड)ले छलफलका लागि डाक्नुभएको हो’, छलफलमा सहभागी एक स्थायी कमिटी सदस्यले भने ।
बैठकमा गृहमन्त्री रामबहादुर थापा, उद्योगमन्त्री लेखराज भट्टसहित केही स्थायी कमिटी सदस्य अनुपस्थित छन् । स्थायी कमिटी सदस्य दीनानाथ शर्माले आफूलाई खबर नभएकाले खुमलटार नगएको बताए । ‘टोपबहादुरजी, मणि थापाजीहरू जानुभएको हो, मलाई खबर थिएन र गइनँ’, उनले भने ।
अहिले पूर्वमाओवादीका कतिपय नेता प्रचण्डको पक्षमा छैनन् । उनीहरूमध्ये केही ओली खेमामा लागेका छन् भने कतिपय वरिष्ठ नेता माधवकुमार नेपालका पक्षमा उभिएका छन् ।
