प्रचण्डनिवासमा गोप्य बैठक, बामदेव र बादल गएनन्
मंसिरमा महाधिवेशन गर्ने केपी ओलीको प्रस्तावमा सहमति जनाएपछि आफ्नै गुटमा आलोचित बनेका नेकपा अध्यक्ष प्रचण्डले बरिष्ठ नेताहरुलाई बोलाएर ओलीसँगको कुराकानीबारे प्रष्ट्याउने प्रयास गरेका छन् ।
प्रचण्डनिवास खुमलटारमा बिहान ९ बजेदेखि सचिवालयका चार नेताहरुबीच छलफल भइरहेको छ । छलफलमा बरिष्ठ नेता झलनाथ खनाल, माधवकुमार नेपाल र प्रवक्ता नारायणकाजी श्रेष्ठ छन् । तीननेताले महाधिवेशन मंसिरमा असम्भव रहेको भन्दै ओलीको प्रस्तावमा असहमति जनाएका छन् । आफ्नै समूहका नेताहरु असन्तुष्ट बनेपछि प्रचण्डले आइतबार बिहान उनीहरुसँग परामर्श गरेका हुन् ।
यसअघि खुमलटार बैठकमा सहभागी हुने गरेका सचिवालय सदस्य रामबहादुर थापा बादल भने खुमलटारको छलफलमा सहभागी भएनन् । बादलले ओलीको प्रस्तावमा समर्थन जनाइसकेका छन् । यद्यपि उनी अन्य काममा व्यस्त भएकाले छलफलमा आउन नभ्याएको खुमलटार स्रोतको दाबी छ ।
उपाध्यक्ष बामदेव गौतम र महासचिव विष्णु पौडेलले भने प्रचण्डलाई एक्ला/एक्लै भेटेका छन् । ओलीले तत्काल आफूमाथिको संकट टार्न महाधिवेशनको बल्छी फालेको माधव नेपाल पक्षको बुझाइ छ । प्रचण्डसँग माधव नेपाल असन्तुष्ट बनेपछि खुमलटारमा पुनः छलफल भएको हो ।
अपराह्न स्थायी कमिटी बैठक बस्ने भनिए पनि अन्योल कायमै छ । बैठकमा महाधिवेशन लगायत प्याकेज सहमतिको प्रस्ताव पेस गर्ने भनिए पनि प्रचण्डले आफ्नो समूहका नेतासँग परामर्श थालेपछि बालुवाटार झस्किएको छ ।
