नेकपाका दुई अध्यक्षबीच टेलिफोन सम्वाद पनि बन्द, दुबै गलाउने रणनीतिमा
विहीबार साँझ सरकारी निवास वालुवाटारमा नेकपाका दुई अध्यक्षबीच चर्काे विवाद भयो । प्रधानमन्त्री केपी शर्मा ओली दुवै पद छोड्ने कुरासम्म सुन्न तयार भएनन् । प्रचण्डपनि आफ्नो अडानबाट पछि नहट्दा नेकपाको विवाद जहाँको त्यही छ ।
नेकपा स्थायी कमिटीको बैठक स्थगित गरि दुई अध्यक्षले सम्वाद थालेका थिए । तित्ततापूर्ण सम्वादपछि दुई अध्यक्षले सम्वाद रोकेका छन् । सम्वादका लागि न प्रचण्डले ओलीलाई आग्रह गरेका छन् नत ओलीले प्रचण्डलाई बालुवाटार बोलाएका छन् । दुई अध्यक्षबीच चार दिनदेखि सम्वाद बन्द छ ।
२४ असारमा दुई अध्यक्षबीच छोटो टेलिफोन सम्वाद भएको थियो । सिन्धुपाल्चोकको बाह्रविसेमा पहिरोले जनजिवन प्रभावित बनेपछि दुई अध्यक्षबीच स्थायी कमिटी बैठक रोक्ने सहमति भएको थियो । त्यसयता दुई अध्यक्षबीच टेलिफोन सम्वाद समेत हुन सकेको छैन ।
अध्यक्ष प्रचण्डलाई साथ दिदै आएका वरिष्ठ नेता माधवकुमार नेपाल, झलनाथ खनाल र वामदेव गौतम पनि कुनै सम्वादमा छैनन् । उनीहरुलाई सम्वादका लागि ओलीले पनि पहल गरेका छैनन् । ओली पक्षिय दोस्रो तहका नेताहरुले गौतमलाई फकाउने र फेरी फसाउने रणनीति बनाएका थिए । तर यसपटक गौतम चुकेनन् ।
दुई अध्यक्षबीचको सम्वाद जहाँको त्यही छ । चार दिनसम्म कुनै सम्वाद गर्न दुवै अध्यक्ष इच्छुक देखिएका छैनन् । एकले अर्कालाई गलाउने रणनीति बनाइरहेका छन् । ओली स्थायी कमिटीको बैठक स्थगित गरि सचिवालय र स्थायी कमिटीका बहुमत पुरयाउने कसरतमा जुटेका छन् भने प्रचण्ड नेपाल समुह २ साउनको बैठक स्थगित नगर्ने पक्षमा पुगेका छन् । ओलीले प्रधानमन्त्री वा अध्यक्ष मध्ये एक पदबाट राजीनामा नदिए केन्द्रीय समितिको बैठक बोलाउने तयारी गरेका छन् ।
प्रचण्ड नेपाल समुहका केन्द्रीय सदस्यहरुले हस्ताक्षर अभियान पनि चलाएका छन् । उनीहरुको हस्ताक्षर अभियानबाट ओली पक्ष झस्किएको छ । तर ओलीपनि सचिवालय र स्थायी कमिटीमा बहुमत पुरयाउन प्रचण्ड नेपाल समुहका नेताहरुसँग आन्तरिक छलफल गरिरहेका छन् ।
नेकपाको विवाद जहाँको त्यही छ । तर शनिवार र आइतवार नेकपाको विवाद मिल्ने अबस्थामा पुगेको चर्चा चल्न थालेको छ । अध्यक्ष प्रचण्डले पार्टीलाई फुटबाट जोगाउन अन्तिमसम्म कसरत गर्ने बताएपछि नेकपाभित्रको विवाद सुल्झिदै गएको आँकलन गरिएको हो । उता ओली निकट स्थायी कमिटीका सदस्य शंकर पोखरेलले चुडिन लागेको नेकपाको डोरी फेरी कसिएको प्रतिक्रिया दिएका थिए ।
