नेकपामा फेरी हस्ताक्षर अभियान, ठाकुर गैरेको नेतृत्वमा १२५ जना पुगे
सत्तारुढ नेपाल कम्युनिस्ट पार्टी (नेकपा) का केन्द्रीय कमिटी बैठकको माग गर्दै १ सय २५ जनाभन्दा बढी केन्द्रीय नेताले हस्ताक्षर संकलन गरेका छन् ।
केन्द्रीय सदस्य ठाकुर गैरेको नेतृत्वमा सुरु भएको हस्ताक्षर संकलन केन्द्रीय समिति बैठक माग गर्न आवश्यक एकतिहाइ मत संकलन गर्ने प्रयासस्वरुप सो संख्याबराबर हस्ताक्षर संकलन भएको हो ।
‘अहिलेसम्म १ सय २५ भन्दा बढी केन्द्रीय सदस्यको हस्ताक्षर संकलन भइसकेको छ,’ गैरेले भने, ‘बाँकी प्रदेश–प्रदेशमा हस्ताक्षर संकलन गरेर केन्द्रीय समिति बोलाउन आवश्यक संख्या जुटाउँदै छौँ ।’
उनका अनुसार ७ वटा प्रदेशमा अहिले थप हस्ताक्षर संकलन भइरहेको छ । अध्यक्ष केपी शर्मा ओली तथा पुष्पकमल दाहाल प्रचण्ड–वरिष्ठ नेता माधवकुमार नेपालले समूहबीच तीव्र विवाद चलिरहेको बेला हस्ताक्षर संकलन गरिएको हो ।
‘पार्टीभित्रको विवाद सचिवालय र स्थायी समितिले गर्न नसकेपछि सो विवादको समाधान खोज्न केन्द्रीय समिति बैठक बोलाउन माग गरेका हौँ, यसमा धेरै साथी उत्साहित भएर हस्ताक्षर गरिरहनुभएको छ,’ केन्द्रीय सदस्य गैरेले भने ।
पार्टी र सरकार चलाउन प्रधानमन्त्रीसमेत रहेका अध्यक्ष केपी शर्मा ओली असफल भएको भन्दै प्रचण्ड–नेपाल समूहले राजीनामा माग गरिरहेका छन् ।
पार्टी विभाजनसम्मको गहिराइमा विवाद पुगेपछि केन्द्रीय सदस्यहरू जुर्मुराएका हुन्, उनीहरूले पार्टी विवाद मिलाउन धुम्बाराहीस्थित केन्द्रीय कार्यालयमा धर्नासमेत दिएका छन् ।
