ओली निकटका नेता र प्रचण्डको गोप्य भेटघाट
सत्तारुढ दल नेपाल कम्युनिष्ट पार्टी (नेकपा) अध्यक्ष एवं प्रधानमन्त्री केपी शर्मा ओली निकटका नेताले अर्का अध्यक्ष पुष्पकमल दाहाल ‘प्रचण्ड’लाई भेटन प्रचण्ड निवास खुमलटार पुगेका छन् ।
पार्टी र सरकारको नेतृत्वबाट राजीनामा दिनुपर्ने माग उठेपछि आज (बिहीबार) बिहान ओली निकटका नेताहरु प्रचण्ड निवास खुमलटार पुगेर छलफल गरिरहेका छन् ।
नेकपा सचिवालय सदस्य, उपप्रधान तथा रक्षा मन्त्री ईश्वर पोखरेल, महासचिव विष्णु पौडेल, नेकपा संसदीय दलका उपनेता सुवास नेम्वाङ, स्थायी कमिटीका सदस्य एवं प्रदेश ५ का मुख्यमन्त्री शंकर पोखरेल सहितका नेताहरु दाहाललाई रिझाउँन खुमलटार पुगेका हुन् । यी सबै नेताहरु ओली निकटका हुन् ।
यसअघि बुधबार बिहान प्रधानमन्त्री ओलीले आफू निकटका नेताहरुसँग बालुवाटारस्थित निवासमा तथा प्रचण्ड र वरिष्ठ नेता माधवकुमार नेपाल निकटका नेताहरु झम्सीखेलको एक रेष्टुरेन्टमा छलफल गरेका थिए । ओलीले सरकार बचाउन र प्रचण्ड, नेपाल समूहले सरकार तथा पार्टी नेतृत्वबाट ओलीलाई हटानका लागि योजनाबद्ध छलफलमा जुटेका हुन् ।
प्रचण्ड र नेपाल समूहको भेलामा सहभागि स्थायी समितिका ३१ सदस्यहरुले ओलीले प्रधानमन्त्री र पार्टी अध्यक्ष दुवै पद छाड्नुपर्ने निष्कर्ष निकालेको थियो । त्यसपछि स्थायी कमिटीका अरु सदस्यहरुसँग पनि छलफल गर्ने भन्दै नेताहरु फर्किएका थिए ।
नेकपा जारी स्थायी कमिटी बैठकमा पार्टी र सरकारको नेतृत्वबाट राजिनामा दिनुपर्ने माग उठिरहेको बेला प्रधानमन्त्री ओलीले आन्तरिक छलफलमार्फत नेतृत्व जोगाउने कसरतमा जुटेका हुन् ।
