नेकपा उपाध्यक्ष वामदेव गौतमले भने : मलाई न्याय चाहियो
सत्तारुढ दल नेपाल कम्युनिष्ट पार्टी (नेकपा) उपाध्यक्ष वामदेव गौतमले महाकाली सन्धिलाई लिएर आफूमाथि कारवाही गरिएको भन्दै न्यायका लागि अनुरोध गरेका छन् ।
नेकपा स्थायी कमिटीको जारी बैठकमा शनिबार बोल्दै उपाध्यक्ष गौतमले आफूलाई कारवाही गर्नु गल्ती भएको कुरा पार्टीले भन्नुपर्ने बताए ।
२०५२ साल २९ माघमा महाकाली सन्धि भएको थियो । त्यतिबेला गौतम महाकाली सन्धिको बिरोधमा थिए । नेकपा अध्यक्ष एवं प्रधानमन्त्री केपी शर्मा ओली, तत्कालिन एमाले महासचिव माधवकुमार नेपाल लगायतका नेताहरु महाकाली सन्धिको पक्षमा थिए । तर, सिपी मैनाली, आरके मैनाली, गौतमसहितका नेताहरु त्यसको विरोधमा थियो ।
सोही कुरा उल्लेख गर्दै गौतमले पार्टीमा महाकाली नदीको मुहान लिम्पियाधुरा भएको बताउँदै त्यतिबेला महाकाली सन्धिको बिरोध गर्दा कारवाही भएकाले पार्टीले अहिले न्याय दिनुपर्ने माग गरेका छन् । महाकाली सन्धिलाई लिएर पार्टी नै विभाजन भएको थियो ।
शारदा बाँध, टनकपुर बाँध, पञ्चेश्वर बहुउद्देश्यीय परियोजनालाई एकीकृत रुपमा बिकास गर्ने उद्देश्यले महाकाली सन्धि भएको थियो । जसलाई गौतम लगायतका नेताले राष्ट्रघाती सम्झौता भन्दै बिरोध गरेका थिए ।
एमालेमा महाकाली सन्धिलाई लिएर केन्द्रीय कमिटी बैठकमै मतादन भएको थियो । एक मतको अन्तरले महाकाली सन्धि पारित गर्ने पक्षमा एमाले भयो । संसदबाट सो सन्धि पारित गर्ने पक्षमा पार्टीले ह्विप जारी गर्यो । तर, गौतम लगायतका नेताहरुले पार्टीको ह्विप उल्लंघन गर्दै मतदान नै नगरेपछि पार्टीले कारवाही गरेको थियो ।
४ असोज २०५३ मा एमालेको समर्थनमा संसदले महाकाली सन्धिलाई अनुमोदन गरेपछि पार्टी थप विवाद शुरु भएको थियो । एमालेले गौतममाथि कारबाही गर्ने निर्णय गरेपछि २१ फागुन २०५४ मा पार्टी फुटेको थियो ।
महाकाली सन्धिको बिरोध गर्ने नेताहरुले साहना प्रधान अध्यक्ष, गौतम महासचिव हुने गरी नेकपा माले गठन गरे । तर पछि गौतम सहितका केही नेताहरु पुनः एमालेमै फर्किएका थिए ।
गौतमले आफूलाई गरिएको कारवाही सम्बन्धित पार्टीको दस्तावेजमा सच्याउँन माग गरेका छन् । पार्टीले त्यतिबेला अन्याय गरे पनि अहिले न्याय दिनेमा गौतम विश्वस्त छन् ।
