सीमामा भारतले एकलौटी बाँध निर्माण गर्यो
नेपालको सुदुरपश्चिम प्रदेशको पश्चिमी सीमा तर्फको बिवाद उत्कर्षमा रहेका बेला रौतहटको सीमावती क्षेत्रमा भारतले एकलौटी रुपमा बाँध निर्माण गरिरहेको छ । रौतहटको ईशनाथ नगरपालिका वडा नं. १ बन्जरहामा रातारात पानीको बहाव समेत अवरुद्ध हुने गरी भारतले दशगजा क्षेत्रमा सडकको नाममा बलियो बाँध निर्माण गरिरहेको छ ।
सत्तारुढ नेपाल कम्युनिष्ट पार्टी (नेकपा) प्रदेश २ का अध्यक्ष प्रभु साहले भारतद्धारा सीमा अतिक्रमण गरी एकलौटी रुपमा दशगजा क्षेत्रमै पानीको बहाव रोक्ने गरी बलियो बाँध निर्माण गर्न थालेपछि सरकारको गम्भिर ध्यानाकर्षण गराएका छन् ।
‘भारतीय पक्षले एकलौटी नेपाल–भारत सीमा क्षेत्रमा रहेको रौतहटको ईशनाथ नगरपालिका वडा नंबर १ बन्जरहामा रातारात पानीको बहाब समेत अवरुद्ध हुने गरी दशगजा क्षेत्रमा सडकको नाममा मजबूत बाँध बनाई रहेको घटनाप्रति सिंगो मुलुकको गम्भीर ध्यानाकर्षण हुन जरूरी छ’ साहले सामाजिक सञ्जाल फेसबुकमा लेखेका छन् । कोरोना भाइरसको महामारीले बिश्वका साथै नेपाल समेत महासंकट र लकडाउनको संबेदनशिल जटिलताबाट गुज्रीरहेको समयमा भारतद्धारा एकलौटी रुपमा दशगजा क्षेत्रमै पानीको बहान रोक्ने गरी बाँध निर्माण गर्न थालेपछि उनले बिरोध गरेका छन् ।
‘भारतीय पक्षद्वारा अवैधानिक एवं अमानवीय ढंगले एकलौटी रुपमा भईरहेको निर्माण कार्यलाई तुरुन्त रोक्न तथा यी र यस्ता गम्भीर चुनौतीपूर्ण विषयहरुलाई तत्काल उच्च स्तरको कुटनीतिक पहल मार्फÞत समाधान गर्न सम्बन्धित सबै पक्षहरुसंग जोडदार माग गर्दछु’ साहले भनेका छन् । अहिले सुदुरपश्चिम प्रदेशको पश्चिमी क्षेत्रको लिपुलेक, लिम्पियाधुरा, कालापानी क्षेत्रको बिषयमा नेपाल र भारतको बीचमा बिवाद चलिरहेको छ । यि क्षेत्र आफ्नो भन्दै विवाद भईरहेकै बेला भारतले रौतहट स्थित दशगजा क्षेत्रमै बलियो बाँध निर्माण कार्य शुरु गरेको छ ।
पानी पर्ने बेलामा पानीको बहाव नै रोक्ने गरी भारतले दशगजा क्षेत्रमा बाँध निर्माण गरिरहेको छ । जसका कारण नेपाल तर्फको गाउँघर पुरै डुबानमा पर्ने निश्चित रहेको छ । यसलाई समयमै नरोकेमा नेपाली जनता बर्खाको बेलामा थप कष्टकर जिवन जिउन बाध्य हुनेछ ।