कालापानीबाट भारतीय सेना लखेट्दैनौं, टीका माला लगाएर बिदा गर्न चाहन्छौंः ठाकुर गैरे
नेपाल कम्युनिष्ट पार्टीका केन्द्रीय सदस्य ठाकुर गैरेले भारतले लिम्पियाधुरा, लिपुलेक र कालापानीमा राखेका सेनालाई नेपालले लखेट्ने होइन, टीका र माला लगाएर बिदा गर्न खोजेको बताएका छन् ।
२०५५ जेठ २२ देखि असार ५ गतेसम्म अनेरास्ववियुले गरेको कालापानी मार्च गर्ने नेतृत्वकर्तामध्येका एक हुन् गैरे । पशुपति नगरदेखि लिम्पियाधुरासम्म भारतले अतिक्रमण गरेका स्थानहरु अंकित नक्सा सहितको पोस्टर बनाउने काम पनि तत्कालीन अनेरास्ववियुका अध्यक्ष योगेश भट्टराई र ठाकुर गैरेहरुकै अगुवाइमा भएको थियो ।
गैरेले सन्धि सम्झौता वा प्रमाणका आधारमा एक अर्काबीच सम्मान र समानताका आधारमा वार्ता गर्न चाहन्छौं भन्दै शनिबार सामाजिक संजालमा लेखेका छन्–‘भारतीय मिडियामा छट्पटी, बर्बराहट, कुतर्क एवं तथ्यबिहीन केवल दम्भ र घमण्डयुक्त बहस सुरु भएको छ । हामी त सन्धि सम्झौता तथ्य प्रमाणका आधारमा एक अर्काबीच सम्मान र समानता को आधारमा बहस र बार्ता गर्न चाहन्छौ । साथै भारतीय सेनालाई नेपाली भूभागबाट लखेटेर होइन एक समारोहको आयोजना गरी टीकामाला लगाएर बिदाइ पो गर्न चाहन्छौ ।’
