थप ९ जनामा कोरोना, संक्रमितको संख्या ३०४ पुग्यो
कोरोना संक्रमितको संख्या थपिने क्रम जारी छ । आज बिहानमात्रै ९ जनामा संक्रमण पुष्टी भएको छ । यो संगै नेपालमा संक्रमितको संख्या ३ सय ४ पुगेको छ ।
आज पुष्टी भएका कोरोना संक्रमित ८ जना रौतहटका छन् । १ जना बारा करैयामाई नगरपालिकाका पुरुष छन् । रौतहट इशनाथ नगरपालिकाका ७ जनामा संक्रमण पुष्टी भएको छ भने माधवनारायण नगरपालिकामा एक महिलामा संक्रमण देखिएको छ । इशनाथका सबै संक्रमित पुरुष छन् ।
बारामा पनि पत्रकारलाई कोरोना संक्रमण
बाराका कोरोना संक्रमित पत्रकार भएको खुलेको छ । सोमबार स्वास्थ्य मन्त्रालयले जारी गरेको सूचनामा बाराका एक जना र रौतहटका ८ जनामा कोरोना पुष्टि भएको उल्लेख छ ।
बाराको करैयामाई निवासी उनी पत्रकार रहेको स्रोतले बतायो । उनी बारा जिल्लाका पाँचौं संक्रमित हुन् ।
यसअघि पर्सामा सक्रिय २, उदयपुरमा १ र जनकपुरमा १ जना पत्रकारमा पनि कोरोना संक्रमण पुष्टि भएको थियो । योसँगै कुल कोरोना संक्रमित पत्रकारको संख्या ५ पुगेको छ ।
संक्रमित पत्रकारहरूको देशका विभिन्न अस्पतालमा उपचार भइरहेको छ ।
सोमबार रौतहटका ८ र बाराका १ जना कोरोना संक्रमित थपिएपछि नेपालभर कोराना संक्रमण पुष्टि भएका व्यक्तिहरुको संख्या ३ सय ४ पुगेको छ ।
नेपालमा दुई जनाको कोरोनाकै कारण मृत्यु भएको छ । पहिलो मृतक सिन्धुपाल्चोककी महिला र दोस्रो मृतक बाँकेका युवक हुन् ।
