ढिलै भएपनि सिरहाको नरहा गाउँपालिकामा ८० लाखको राहत बाडिँदै
चोहर्वा ( सिरहा ) लकडाउन लागु भएको करिव ५० दिन वित्दै गर्दा सिरहाको नरहा गाउँपालिकामा ८० लाख रुपैयाँ बराबरको राहत वितरण अन्तिम चरणमा पुगेको छ । पर घरधुरी २५ किलो चामल , ५ किलो आलु , १ लिटर खाने तेल र १ किलो नुनका दरले राहत वितरण सुरु गरिएको हो ।
नरहा गाउँपलिका वडा नम्बर ३ मा गएको सोमवारबाट राहत वितरण गर्न सुरु गरिएको छ । वडाध्यक्ष अनिशुल अनसारीका अनुसार यस वडामा ८५० घरधुरीलाई राहत वितरण गरिने तयारी छ । यस वडामा सबै भन्दा बढि दलित समुदायको जनघनत्व रहेको पनि वडाध्यक्ष अनसारीले बताए । यस वडामा ३ दिनसम्म राहत वितरण गरिने कार्यक्रम छ ।
गाउँपालिकाभरी वडानम्बर ३ का वडाध्यक्ष अनसारी जनप्रिय प्रतिनिधीका रुपमा परिचित छन् । अनसारी जनता समाजवादी दलका नेता पुर्वसञ्चारमन्त्री राजकिशोर यादव निकट मानिन्छन् । सिरहा जिल्लाकै गरिव गाउँपालिका भनेर चिनिएको नरहा गाउँपालिकामा राहत वितरणमा ढिलाई भएपछि जनआक्रोश बढेको थियो । राहत वितरणका लागि लागत सकंलनमा ढिलाई भएकाले राहत वितरणमा पनि ढिलाई भएको गाउँपालिका अध्यक्ष रामशरण यादवले बताए । उनले भने , प्रदेश सरकारले उपलब्ध गराएको १० लाख रुपैयाँमा गाउँपालिकाबाट त्यसैमा ७० लाख थप गरेर जम्मा ८० लाख रुपैयाँ बराबरको राहत वितरण गर्न थालेका हौँ ।
त्यस्तै गाउँपालिकाकी प्रमुख प्रशासकिय अधिकृत सुमित्रा लामाले गाउँपालिकाका ५ ओटा मध्ये अब एउटा वडामा मात्र राहत वितरण गर्न बाँकी रहेको जानकारी दिईन् । चोहर्वामा रासन वितरण गरिदै गर्दा स्थलगत अनुगमनमा पुगेका नेपाल पत्रकार महासघँका केन्द्रीय पार्षद् तथा सतरुढ दल नेकपा निकट प्रेस सगंठन नेपालका केन्द्रीय सदस्य पत्रकार सन्तोष बराइलीसँग प्रमुख प्रशासकिय अधिकृत लामा भन्दै थिईन् , ढिलो गरि भएपनि राहत वितरण गर्न हामी सफल भएका छौँ , योनै खुशीको कुरा हो ।
