सञ्चार केन्द्र नेपालले सञ्चारकर्मीहरुलाई निःशुल्क दन्तसेवा

 

तराई विकास तथा सञ्चार केन्द्र नेपालद्वारा सञ्चालित सञ्चार केन्द्र नेपालले कोरोनाको बेला पनि उच्च जोखिम मोलेर समाचार संकलनमा खटिने सञ्चारकर्मीहरु र रौतहटबासीलाई आज शुक्रबारबाट निःशुल्क दन्त सेवा प्रदान गर्ने भएको छ । ओम डेण्टल समाज होमका डाक्टरहरुको सहयोगमा सञ्चारकर्मीहरुलाई उक्त सेवा प्रदान गर्न सञ्चार केन्द्र नेपालले दन्त सेवा कार्यको सुरुवात गरेको हो ।

पूर्वप्रधानमन्त्री तथा वरिष्ठ नेता माधवकुमार नेपालले दन्त सेवा परीक्षण स्टलको उद्घाटन गर्दै कोरोना भाइरस (कोभिड १९)को संन्त्रासका बीच पनि समाचार संकलनका लागि फ्रन्टलाइनमा खटिने सञ्चारकर्मीहरुलाई निःशुल्क दन्त सेवा उपलब्ध गराउने कार्य सह्रानिय भएको बताउनुहुँदै कार्यक्रमको आयोजना गर्ने सञ्चार केन्द्र नेपाल र ओम डेण्टल समाज होमलाई धन्यवाद दिनुभयो । मुखको सफाईले कोरोना नियन्त्रणमा महत्वपूर्ण भूमिका खेल्न सक्ने बताउँदै नेता नेपालले सञ्चारकर्मीहरुलाई ध्यानमा राखेर उपचार कार्यक्रमको आयोजना गर्नु उपयुक्त समयमा महत्वपूर्ण कार्य भएको बताउनुभयो । विश्वभर महामारीको रुपमा फैलिएको कोरोना भाइरसबाट नेपाल कम संक्रमित भएको देशका रुपमा रहनु सुखद भएको बताउनुहुँदै भावी दिनमा समेत संकट टार्नको लागि सबैले सचेतना अपनाउन आग्रह गर्नुभयो ।

अहिलेको अवस्थामा कोरोना नियन्त्रणमा सरकारले चालेका कदमहरु प्रभावकारी भएको भन्दै यसलाई थप प्रभावकारी बनाउन जरुरी भएको नेता नेपालको भनाई थियो । कार्यक्रममा ओम डेण्टल समाज होमका डाक्टर सुवास घिमिरेले केही गरौँ भन्ने भावनाका साथ आफूँहरुले निशुल्क रुपमा यो सेवा प्रदान गरेको बताउनुभयो । आफूहरुले विगतमा पनि मुलुक संकटमा पर्दा सामाजिक उत्तरदायित्व निर्वाह गर्दै आएको जानकारी गराउँदै सञ्चार केन्द्र नेपालसँगको सम्झौता गरेअनुरुप उपत्यकाका सबै सञ्चारकर्मीहरुको निःशुल्क दन्त परीक्षण र उपचार गर्ने प्रतिवद्धता जनाउनुभयो ।

कार्यक्रममा प्रमुख अतिथि नेपालसहित वरिष्ठ पत्रकारहरु पुरु रिसाल, तीर्थ कोइराला, शम्भु श्रेष्ठ, बालकृष्ण बस्नेत, दामोदर प्रसाद दवाडी, सागर पण्डित, विएन दाहाल, टंक पन्तसहित दुई दर्जन पत्रकारहरुले दातको उपचार गराएका थिए । सो क्रममा बोल्दै डा. घिमिरेले मानव स्वास्थ्यका लागि दात सफाई महत्वपूर्ण हुने भन्दै सफाईका तरिका समेत बताउनुभएको थियो । कार्यक्रममा सञ्चार केन्द्र नेपालका अध्यक्ष एवं नेपाल पत्रकार महासंघका केन्द्रीय सदस्य गोविन्दप्रसाद चौलागाईंले समाचार संकलनमा फ्रन्टलाइनमा खटिने सञ्चारकर्मीहरु र रौतहटबासीहरुसमेत लाभान्वित हुने गरि कार्यक्रम राखिएको चौलागाईंले बताउनुभयो ।

उपत्यकामा खटिने सम्पूर्ण सञ्चारकर्मीहरुलाई यो सेवा लिनका लागि विजुलीबजारस्थित सञ्चार केन्द्र नेपालको हलमा सबैलाई आमन्त्रण गर्दै चौलागाईंले भन्नुभयो–‘लकडाउनका बीचमा दाँतको दुखाईमा पर्नुभई हिँडडुल गर्न नसक्ने सञ्चारकर्मीहरुको घर घरमै डाक्टर सहितको टिम नै परिचालन उपचार गर्न सकिने व्यवस्था मिलाएका छौँ, समस्या परे खबर गर्नहोला ।’ रौतहटबासीलाई राहत वितरण सोही कार्यक्रममा प्रमुख अतिथि नेपालले रौतहट जिल्ला घर भई काठमाडौमा बसोबास गर्ने ३५ परिवारलाई राहत प्रदान गर्नुभएको छ । लामो समयदेखि लकडाउन भएपछि समस्यामा परेका रौतहटबासीलाई नेता नेपालले चामल, दाल, नुन, तेललगायतका खाद्यसामाग्री उपलब्ध गराउनुभएको हो । राहत वितरण कार्यक्रमको संयोजन पनि सञ्चार केन्द्र नेपालले गरेको थियो ।