प्रधानमन्त्री ओलीले एक महिना आराम गर्नु पर्ने
प्रधानमन्त्री केपी शर्मा ओलीको स्वास्थ्यमा सन्तोषजनक सुधार देखिएपछि दुई दिनभित्र डिस्चार्ज गर्ने गरी चिकित्सकहरु तयारी थालेका छन् । अस्पतालबाट डिस्चार्ज भएपनि करिव एक महिना प्रधानमन्त्री ओलीले निवासमै आराम गर्ने भएका छन् ।
झण्डै एक साताअघि प्रधानमन्त्री ओलीको त्रिभुवन विश्वविद्यालय शिक्षण अस्पतालमा मिर्गौला प्रत्यारोपण गरिएको थियो । गत सोमबार अस्पतालमा भर्ना भएका ओलीको बुधवार मात्र मृगौला प्रत्यारोपन गरिएको थियो । प्रत्यारोपन गरिएको मृगौलाले काम गर्न थालेको छ भने उनको स्वास्थ्यमा दैनिक सुधार हुँदै आएको छ । स्वास्थ्यमा सन्तोषजनक सुधार आएपछि दुई दिनभित्र डिस्चार्ज गर्ने तयारी उपचारमा संलग्न चिकित्सकहरुले थालेका छन् ।
‘उहाँको स्वास्थ्य हामीले चाहेअनुसार नै सुधार हुँदै गएको छ’ उपचारमा संलग्न चिकित्सक प्रा.डा. प्रेमराज ज्ञवालीले भने ‘यही अबस्था रहे २ दिनभित्र उहाँ डिस्चार्ज हुनुहुनेछ ।’
डाक्टर ज्ञवालीकाअनुसार प्रधानमन्त्री ओलीको रगत, रक्तचाप, पिसाबलगायत सबै सूचकाङ्क राम्रो स्थितिमा छन् । स्वास्थ्यका सवै सुुचकांकहरु राम्रो स्थितिमा भएपनि प्रधानमन्त्री ओलीले एक महिना आराम गर्नुपर्ने सुझाव चिकित्सकहरुले दिएका छन् । अहिले उनलाई सन्तुलित आहार दिन थालिएको र नियमित हिँडडुल गराउन थालिएको छ । सङ्क्रमणको जोखिम बढने सक्ने भन्दै डाक्टरहरुले तत्काल काममा नफर्किन र आराम गर्न सुझाव दिएका छन् ।
