नेकपाका धेरै केन्द्रीय सदस्यबीच नै चिनजान छैन
नेकपा केन्द्रीय कमिटी बैठकमा राजनीतिक प्रतिवेदन, सांगठनिक प्रतिवेदन र विधान संशोधन प्रस्तावबारे समूहगत छलफल सुरु भएको छ । राष्ट्रियसभा गृह, धूम्रबाराही र पेरिसडाँडाका कार्यालयमा १५ समूह छलफलमा व्यस्त छन् । बैठकमा पार्टी र सरकारको सम्बन्ध, राष्ट्रिय, अन्तर्राष्ट्रिय सवाल, मिलेनियम च्यालेन्ज कर्पोरेसन (एमसीसी) अनुमोदन, सीमा विवादलगायत मुख्य विषय छन् ।
धेरै केन्द्रीय कमिटी सदस्यबीच भने चिनजानै छैन । ‘बाटामा भेट्दा एकअर्कालाई नचिन्ने अवस्था नहोस्, आपसमा हात मिलाइयोस् र अभिवादन साटासाट होस् भनेर बैठकमा सहभागीबीच खुलेर कुराकानी गर्न थालेका छौं’, केन्द्रीय सदस्य मनकुमारी केसीले भनिन् । केन्द्रीय सदस्य गरिमा साहले एकतापछि घुलमिल हुने क्रम बढेको जनाउँदै बैठकमा प्रस्तुत कार्यसूचीमा गहनताका साथ छलफल जारी रहेको बताइन् । समावेशी सिद्धान्तअनुसार महिलालाई सचिवालय र स्थायी कमिटीमा राख्नुपर्ने, पार्टीमा माथिल्लो कमिटीको हस्तक्षेप कम हुनुपर्ने मत राखेको उनले सुनाइन् । अर्का केन्द्रीय सदस्य यदुवंश झाले शीर्ष नेता र केन्द्रीय सदस्यबीच एकताको २० महिनापछि साक्षात्कार हुन पाएको उल्लेख गरे । पार्टीलाई तराई–मधेसमा थप प्रभावकारी बनाउन यो बैठक सार्थक हुने अपेक्षा उनले व्यक्त गरे ।
केन्द्रीय सदस्यले पार्टी अध्यक्षद्वय केपी शर्मा ओली र अध्यक्ष पुष्पकमल दाहाल ‘प्रचण्ड’को राजनीतिक प्रतिवेदन, महासचिव विष्णुप्रसाद पौडेलको सांगठनिक प्रतिवेदन र विधान संशोधन प्रस्तावमाथि छलफल गरी टोली नेतामार्फत शुक्रबार र शनिबारको बैठकमा प्रस्तुत गर्नेछन् । वर्णानुक्रमअनुसार विभाजन गरिएका ४ सय ४१ केन्द्रीय सदस्यले प्रतिवेदनमाथि छलफल गरिरहेको स्थायी कमिटी सदस्य छविलाल विश्वकर्माले बताए । समूहले आफ्नो टोली नेता आफैं चयन गरेका छन् ।
टोली नेतालाई २०/२० मिनेट समय दिइएको छ । बैठक सोमबारसम्म सञ्चालन हुनेछ । बन्दसत्रमा अध्यक्ष प्रचण्डले पार्टीको राजनीतिक प्रतिवेदन प्रस्तुत गर्दै आगामी २०७७ चैतमा एकता महाधिवेशन गर्ने प्रस्ताव पेश गरेका थिए । बैठकमा केन्द्रीय निकायका अध्यक्षलाई पनि १० मिनेट बोल्न दिइने भएको छ । समूहगत छलफलमा उठेका विषयमा आइतबार निष्कर्ष प्रस्तुत गर्ने र दस्तावेज पारित गर्ने कार्यतालिका छ ।
