देउवाले पनि सभामुखलाई बधाई दिए
विपक्षी दलका नेता शेरबहादुर देउवाले मुस्किल मुस्किलले सभामुख चयन भएको भन्दै अग्निप्रसाद सापकोटालाई बधाई दिएका छन् । सापकोटा सभामुख भएपछि मंगलबार बसेको पहिलो बैठकमा सबै दलका नेताहरुले शुभकामना दिने कार्यतालिका थियो । सुरुमा सत्तारुढ नेपाल कम्युनिस्ट पार्टी (नेकपा) संसदीय दलका नेता समेत रहेका प्रधानमन्त्री केपी शर्मा ओलीले सम्बोधन गर्दै शुभकामना दिए ।
लगतै सम्बोधन गरेका देउवाले सुरुमै सापकोटालाई व्यंग्य गरे, ‘धेरै ठूलो रस्साकस्सीका बाबजुद मुस्किल मुस्किलले ढिलै भएपनि सभामुख चयन हुनु भएकोमा सभामुखजीलाई हार्दिक बधाई ज्ञापन गर्न चाहन्छु ।’
सभामुख कुनै पार्टीको नभई सम्पूर्ण सदनको भएको भन्दै उनले प्रतिपक्षलाई विश्वास लिएर अगाडि बढ्न सुझाव दिए । सभामुख तटस्थ पद भएकाले कांग्रेसले उम्मेदवारी नदिएको भन्दै उनले सदन सञ्चालनमा सहयोग गर्ने बचन समेत दिए ।
