विप्लव कमजोर भएपछि नेकपामा आउने तयारी, बादलसगँ गोप्य भेट
सरकार आक्रामक हुँदै नेता कार्यकर्तामाथि कारबाही र पक्राउमा उत्रिनु र प्रभावशाली मानिएका नेता नै पार्टी छाडी सत्तारुढ नेकपामा प्रवेश गर्नुले प्रतिबन्धित पार्टीभित्र भुइँचालो गएको छ ।
उक्त पार्टीका प्रवक्ता खड्गबहादुर विश्वकर्मा प्रकाण्ड सत्तारुढ नेकपामा प्रवेश गर्नका लागि तयार रहेका छन् भने विप्लवले तत्काल आत्मसमर्पण नगर्ने बताउँदै आएका छन् ।
यसमा रोचक के छ भने प्रतिबन्धित पार्टीका नेता कार्यकर्ताले सत्तारुढ नेकपा अध्यक्ष पुष्पकमल दाहाल प्रचण्डमार्फत सेफल्यान्डिङका विषयमा कुरा चलाइरहेका छन् । तर, प्रचण्ड कुनै पनि हालतमा विप्लवकै नेतृत्वमा पार्टी समाहित हुनुपर्छ भन्ने सन्देश दिइरहेका छन् ।
प्रभावशाली नेता र कार्यकर्ता पक्राउ गरेपछि विप्लव समूह कमजोर भएको मुल्यांकन विभिन्न चरणमा हुन थालेको छ । उक्त कमजोर समूहभित्र पनि प्रकाण्ड बहुमतमा रहेको स्रोतले जनाएको छ । विप्लव समूहलाई नेकपामा प्रवेश गराउनका लागि प्रचण्डले वार्ता जारी राखेका छन् । बहुमत सदस्य नेकपामा ल्याउन प्रकाण्ड तयार छन् तर प्रचण्ड उनलाई विश्वास गर्दैनन् । ‘तत्कालिन एमाओवादी विभाजन हुनुअघिदेखि नै प्रकाण्ड प्रचण्डको विश्वासमा छैनन्, उनी विप्लवसहितको समूह छिराउन तयार छन्’, स्रोतले भन्यो ।
सरकारले उक्त पार्टीलाई प्रतिबन्ध गर्नुअघि प्रचण्डलाई नै ज्यान मार्न सक्ने खतरा रहेको कारणलाई अगाडि सारेको थियो । उक्त समूहभित्र प्रकाण्डकै नेतृत्वमा त्यस्तो निर्णय भएको बताइन्छ । त्यसै कारण पनि प्रकाण्ड र विप्लवबीच मनमुटाव रहेको स्रोतको दाबी छ ।
विप्लव समूह कमजोर हुनुका कारण
हिंसात्मक गतिविधिमा सक्रिय भएपछि सरकारले विप्लव समूहमाथि पक्राउ र कारबाहीको श्रृङ्खला अगाडि बढायो । यो क्रममा प्रहरी इन्काउन्टरमा कुमार पौडेल मारिए भने अन्य कार्यकर्ता पनि मुठभेडमा मारिएका थिए ।
त्यसअघि स्थायी समिति सदस्य सुदर्शन ओलीसहितका कतिपय प्रभावशाली नेता पक्राउ गरिए । सोही क्रममा गत ३० असोजमा प्रहरीले दाङको राजपुर गाउँपालिका–४ बाट विप्लवका दाजु मध्य पश्चिमाञ्चल कमाण्ड इञ्चार्ज चन्द्रबहादुर चन्द पक्राउ गरिए । यसले उक्त समूहलाई ठूलो धक्का लागेको रिपोर्ट प्रहरीले गृह मन्त्रालयलाई बुझाइसकेको छ ।
यस्तै राप्ती व्युरो इन्चार्जलगायत २१ जनालाई एकै ठाउँमा पक्राउ गरी कारबाही चलाइएको थियो । विप्लव समूहबारेका धेरै सूचना राज्यसँग रहेको र चाहेको बेला पक्राउ गरी कारबाही चलाउन सक्ने विषयमा उक्त समूहमा बेलामौका छलफल समेत हुने गरेको बताइएको छ ।
त्यसो त पदम राईलगायतका नेताहरुले नै पार्टी छाडी नेकपा प्रवेश गरेको, सोमबार साँझ मात्रै पूर्व केन्द्रीय सदस्य गुणराज लोहनीसहितलाई प्रहरीले पक्राउ गरिनु पनि विप्लव समूहका लागि ठूलो धक्का बनेको छ ।
त्यसो त प्रहरीसँग रहेको रिपोर्टअनुसार एक बर्षको दौरानमा मात्र विप्लव समूहमा एक हजार २ सय जना पक्राउ गरिएका थिए जसमा एक हजार १ सय १९ जनाविरुद्ध मुद्दा दर्ता भएको थियो । १३९ जनालाई त कारागार नै चलान गरिएको छ । प्रहरी विशेष सूचनाअनुसार एक बर्षको अवधिमा झन्डै एक हजार जनाले पार्टी परित्याग गरिसकेका छन् ।
‘सो पार्टीको रणनीतिक योजना बनाउने संयन्त्र नै ध्वस्त भइसकेको छ । वार्तामा जानुपर्ने बाध्यतामा सुरक्षा निकायले पुराइसकेको छ’, प्रहरीले गृह मन्त्रालयमा पठाएको तथ्यांकमा उल्लेख छ ।
कतिसम्म भने कुन कुन ठेगानामा रहने र पार्टीको संरचना कस्तो रहेको भन्ने विषयमा पनि सरकारसँग पूर्ण जानकारी रहेको छ । समूहको सांगठनिक संरचनालाई परिवर्तन गरी पार्टीको केन्द्रीय संरचनामा पार्टी महासचिव नेत्र बिक्रम चन्द बिप्लवको प्रत्यक्ष नियन्त्रणमा रहने ५ सदस्यीय सचिवालय र ३ सदस्यीय केन्द्रीय सल्लाहकार समितिर ३० सदस्यीय केन्द्रीय समिति गठन भएको छ । औपचारिक रुपमा सांगठनिक संरचना भित्र उल्लेख नगरिएको भएता पनि पार्टी चलाउने दिपकको कमाण्डमा सैन्य ब्यूरो समेत रहेको जानकारी राखेको सुरक्षा निकायले त्यसलाई नियन्त्रणमा लिन सकिने रिपोर्ट बुझाएको छ ।
त्यसो त हालै मात्र विप्लव समूहमा पोलिटव्युरो सदस्य रहेका मोहन कार्की सत्तारुढ पार्टीमा प्रवेश गरेपछि उक्त समूह झनै कमजोर बनेको सरकारको बुझाई छ ।
