डिस्चार्ज गर्न नसक्दा सुत्केरी श्रीमति बन्धक भएपछि रकम जोहो गर्न भीख माग्दै श्रीमान
सुत्केरी श्रीमतिको उपचार खर्च तिर्न नसकेर एक व्यक्ति भौतारिरहेका छन् । उनी आफ्नो श्रीमतिको उपचार खर्च तिर्न नसकेर श्रीमतिलाई नै अस्पतालले बन्धक बनाएपछि भिख माग्दै भौतारिएका हुन ।
अस्पतालको पैसा तिर्न नसकेपछि बन्धक बनाएका व्यक्ति हुन् सप्तरीको तिलाठी कोइलाडी गाँउपालिका तोपाकी ललितादेवी मण्डल । उनलाई उपचार रकम तिर्न नसक्दा विराटनगरस्थित विराटनगर अस्पतालले बन्धक बनाएको हो ।
उनका श्रीमान गोपी मण्डल अहिले आफ्नो श्रीमतिलाई अस्पतालबाट छुटाउनको लागि भिख माग्दै हिडिरेहेका छन् । एक महिना अघि श्रीमतिलाई सुत्केरी व्यथाले च्यापेपछि ललितालाई विराटनगरस्थित जनरल हस्पिटल एन्ड ट्रमा केयर सेन्टर पुर्याएको थियो । ललिताले त्यहाँ जुम्ल्याहा छोरी जन्माएकी थिईन ।
त्यहाँ उनको उपचार हुन नसकेपछि विराटनगर अस्पताल पु–याइएको थियो । अस्पताल लगेपछि उपचारमा गरिएको र उपचार खर्च तिर्न नसकेपछि उनलाई बन्धक बनाईएको उनका श्रीमान गोपीको कथन छ ।
गोपीले ट्रमा सेन्टरमा सुत्केरी गराउनेदेखि छोरीको उपचार खर्चसमेत गरेर १ लाख ७४ हजार रुपैयाँ बुझाएपनि अस्पतालले अझै ३ लाख ५० हजार रुपैयाँ बाँकी रकम तिरेपछि मात्रै डिस्चार्ज गरिदिने भनेपछि गोपी अहिले माग्न हिडेका छन् । गोपीको घरको आर्थिक अवस्था निकै कमजोर रहेकोले यस्तो समस्या आएको हो ।
यस अघि दुई लाख भन्दा बढी ऋण खोजेर अस्पतालमा बुझाएपनि बाँकी रकम जोहो गर्न नसकेका कारण आफू माग्न हिडेको गोपी बताउछन् । उता अस्पतालले भने ५ हजार धरौती मात्र बुझाएको बताएको छ । अस्पतालका अनुसार अहिले अस्पतालले उपचार बाहेक पनि केही सहयोग गर्नसक्ने तर, उपचार खर्च पूरै मिनाहा गर्न नसकिने बताएको छ ।
अस्पतालले जटिल अवस्थामा आएका बिरामीलाई सामान्य अवस्थासम्म ल्याइपुर्याउँदा पैसाको कारण उपचार नरोकेको तर, खर्च नतिरी डिस्चार्ज गर्न नमिल्ने बताएको छ । यसरी पैसाकै कारण आफ्नो श्रीमतिलाई अस्पतालले बन्धक बनाएपछि गोपी अहिले सडकमा माग्दै हिडेको दृश्य देखिन्छ । जुन निकै कारुणिक लाग्छ ।
उनी आफ्नो श्रीमतिलाई अस्पतालबाट छुटाएर घर लैजान चाहन्छन् तर पैसा नतिरी लान पाउदैनौ भनेपछि यतिखेर गोपी तनावमा रहेका छन् । तर उनले हरेस नखाई आफ्नो श्रीमतिलाई जसरी पनि अस्पतालबाट डिस्चार्ज गरिछाड्ने प्रण गरेका छन् ।
