वडा अध्यक्ष आफ्नै कर्मचारीसँग बन्द कोठामा मस्ती, स्थानीयले गरे रामधुलाइ
पर्साको छिपहरमाई गाउँपालिकाका वडा अध्यक्षलाई स्थानीयले निर्घात कुटपिट गरेका छन् । गाउँपालिकाको वडा नं. ३ जयमंगलापुरका वडाध्यक्ष विनोद साह कानु स्थानीयद्वारा कुटिएका हुन् ।
वडा कार्यालयमा सेवाग्राही पुग्दा वडाध्यक्ष कानु र वडा कार्यालयकी सहयोगी महिला एउटा बन्द कोठामा थिए । वडा कार्यालय पुगेका सेवाग्राहीले कार्यालयको कोठाको ढोका खोल्दा वडाध्यक्ष कानु आक्रोशित हुँदै स्थानीयलाई गालीगलौज गर्न थाले पछि विवाद भएको थियो । कोठा खोलेको निहुँमा वडाध्यक्ष स्थानीय माथि गाली गलौज गर्दै खनिए पछि विवादले उग्ररुप लिएको थियो ।
यसै विषयलाई लिएर कानुको आचरण ठिक नभएको आरोप लगाउँदै कार्यालयमा जम्मा भएका स्थानीयले रामधुलाइ गरेका हुन । वडा अध्यक्षको पक्ष लिएर गाउँपालिका प्रहरीले स्थानीयहरु माथी जाईलागे पछि स्थानीयहरुले प्रहरीहरुलाई समेत कुटपिट गरेका थिए । प्रहरी विकाउ साह र दिलिप यादवलाई स्थानीयले कुटेका हुन ।
कुटपिट गरेको आरोपमा २ जनालाई प्रहरीले पक्राउ समेत गरेको छ । घटना बारे अनुसन्धान गर्न स्थानिय वृजेश मुखिया विन र अनिश कुमार साहलाई वुडगाई प्रहरी चौकीले नियन्त्रणमा लिएको इलाका प्रहरी कार्यालय पोखरियाका प्रहरी निरिक्षक चन्द्र सिंहले बताए ।
सिंहले भने- ‘कर्मचारी माथी कुटपिट भएको बुझ्नमा आएको छ हामी घटना बारे थप अनुसन्धान गरि रहेका छौँ ।’ कानु तत्कालीन नेपाल कम्युनिष्ट पार्टी माओवादीबाट निर्वाचित वडाध्यक्ष हुन ।
