उपेन्द्र यादवले न सरकार छाडे, न मन्त्रालय पुगे
उपप्रधानमन्त्री उपेन्द्र यादव दिल्ली भ्रमणमा रहेका बेला प्रधानमन्त्री ओलीले मन्त्रीपरिषद पुर्नगठन र हेरफेर गरे । आफुसँग सल्लाह नै नगरी स्वास्थ्य तथा जनसंख्या मन्त्रालयको जिम्मेवारी खोसिएपछि यादवले सरकार छाड्ने आशंका पनि गरियो । तर शनिवार बसेको समाजबादी पार्टीको बैठकले सरकार नछाड्ने निर्णय गरेर आशंकालाई अन्त्य गरिदिएको छ ।
सरकार नछाड्ने निर्णय गरेपनि उपप्रधानमन्त्री यादव आफ्नो नयाँ मन्त्रालय पुगेका छैनन् । काननु, न्याय तथा संसदीय व्यवस्था मन्त्रालयमा पदभार ग्रहण नगरी राजधानी बाहिर हिडेका छन् । न सरकार छाडेका छन् न नयाँ मन्त्रालय पुगेका छन् । बिलखबन्दमा परेका यादव आइतवार पोखरातर्फ लागेका छन् ।
संघिय सामाजबादीले सरकार नछोड्ने निर्णय गरेपछि काननु, न्याय तथा संसदीय व्यवस्था मन्त्रालयका कर्मचारी स्वागतका लागि तयारीमा थिए । यादवको नाम प्लेट पनि शुक्रवारसम्म बनाइएको थिएन । कागजमा लेखेर राखिएको थियो । सरकार नछोड्ने निर्णय गरेपछि सार्वजनिक विदाको दिन आइतवार यादवको नेम पिलेट बनाइएको मन्त्रालय स्रोतले बताएको छ ।
यादवले नयाँ मन्त्रालयको जिम्मेवारी लिँदा सपथ खानु पर्दैन । तर मन्त्रालयको पदभार ग्रहण भने गर्नुपर्दछ । चार दिनअघि नेपाल आएका यादव सिंहदरवार पसेका पनि छैनन् । मन्त्रालय सारिएकोमा उनी दुखि छन् । सरकार छाड्दा गौर हत्याकाण्ड बल्झिने आशंकामा छन् ।
प्रधानमन्त्री ओलीसँग सम्वाद गरेपछि मात्र पदभार ग्रहण गर्ने पक्षमा यादव पुगेका छन् ।
प्रधानमन्त्रीसँग सम्वाद गर्न नेता डा. बाबुराम भट्टराईको नेतृत्वमा समिति गठन भइसकेको छ । ‘प्रधानमन्त्रीसँगको सम्वादपछि मात्र उहाँले पदभार ग्रहण गर्नुहुनेछ’ उनी निकट समाजबादीका महासचिव रामसहाय प्रसाद यादवले भने ।
