अबदेखि कहिल्यै नहुने भयो नागढुंगा–नौबिसे सडकमा जाम
सरकारले पहलकमदी लिएपछि दशैंको मुखमा संघीय राजधानी काठमाडौं भित्रिने मुख्य नाका नौबिसे–नागढुंगा सडकमा सवारी आवागमन केही सहज भएको छ । स्थलगत अनुगमन गरी व्यवस्थापकीय कमजोरी सुधार गरेपछि शनिबारदेखि सवारी आवागमनमा केही सहज भएको हो ।
लामो जाममा यात्रु फस्न थालेपछि महानगरीय ट्राफिक प्रहरीसहित जिल्ला प्रशासन कार्यालयले जाम खुलाउन बिकल्प अपनाएपछि आज हिजो भन्दा सहज भएको छ । दशैंको मुखमा गरिएको निर्माण कार्यले नाकढुंगा–नौबिसे सडकमा लामो सवारी जामका कारण केही दिनदेखि यात्रुले सास्ती पाउँदै आएका थिए । जाममा फसेका यात्रुको ज्यानै जान थालेपछि सरकारले समाधानको प्रयास अघि बढाएको हो । यही क्रममा गृहमन्त्री रामवहादुर थापाले शुक्रवार नै सबै पक्षलाई मन्त्रालयमै बोलाएर तत्काल समस्या समाधानका लागि काम थाल्न निर्देशन दिनुभएको थियो ।
गृहमन्त्री थापाको निर्देशनपछि काठमाडौंका प्रमुख जिल्ला अधिकारी जनकराज दाहाल नेतृत्वको टोलीले शनिवार नौबिसे–नागढुंगा सडकको स्थलगत निरीक्षण गरेको थियो । अनुगमनको क्रममा टोलीले सवारी जाम हटाउने बिभिन्न बिकल्प अपनाएपछि यातायात आवगमनमा केही सहज भएको ट्राफिक महाशाखाको भनाई छ । नागरिकलाई शास्ती बढेपछि यातायात आवागमन सहज बनाउन सरकारले विभिन्न रणनीतिसमेत अपनाउन थालेको छ । सडकमा जाम हुन नदिन तत्कालका लागि सडकमा भैपरी आउनसक्ने समस्याका लागि क्रेन र डोजर जस्ता उपकरण तयारी अबस्थामा राखिएको छ ।
यस्तै स्थानीय प्रशासनले आजदेखि १२ चक्के सवारीलाई निश्चित समयमा मात्र प्रवेश गर्न पाउनेगरी व्यवस्थापन गरेको छ । ट्राफिकका अनुसार आजबाट १२ चक्के सवारीलाई सवारी चाप हेरेर रातको ९ बजेपछि मात्र प्रवेश अनुमति दिइने ब्यवस्था मिलाइएको छ । यस्तै सडकमा ओभरटेकको समस्या देखिएकाले प्रत्येक सय मिटरमा प्रहरी परिचालन गरी सवारी अनुशासनलाई कडाई गरिएको र प्रहरीलाई समन्वयात्मक भूमिकाको जिम्मेवारी दिइएको छ ।
यस्तै सडक विभागले सडकको अवस्था सुधार गर्दै खाल्डाखुल्डी पुर्ने लगायतका काम पनि अघि बढाएको छ । दशैंको बेला काठमाडौं उपत्यकाबाट नाकढुंगा नाका हुँदै अधिकांश यात्रु बाहिरिने गरेका छन । सोही कारण दशैं सुरु हुनु अघिबाटै सो सडकमा लामो सवारी जाम हुने गरेको छ । यस पटक केही दिन बिगतमा भन्दा पनि लामो सवारी जाम भई घन्टौं यात्रुले शास्ती खेप्नु परेपछि बिकल्पसहित काम अघि बढाइएको हो । सवारी जाम गर्न बिकल्प अपनाएसँगै आजबाट यात्रुले सहजता महसुस पनि गरेका छन ।
