निर्वाचन आयोगमा नेकपाले दल दर्ता गर्यो
सत्तारूढ नेपाल कम्युनिस्ट पार्टी (नेकपा) ले दल दर्ताका लागि निर्वाचन आयोगमा निवेदन दर्ता गराएको छ । आउँदो मंसिर १४ का लागि तय गरिएको उपनिर्वाचनका लागि नेकपाले बिहीबार बिहान आयोगमा दल दर्ताको निवेदन दिएको हो ।
परराष्ट्रमन्त्री समेत रहेका नेकपा नेता प्रदीप ज्ञवालीले दल दर्ताका लागि निर्वाचन आयोगमा प्रस्तुत गरिएको जनाएका छन् । नेकपाका निर्वाचन विभागका प्रमुख समेत रहेका ज्ञवालीले निर्वाचन आयोगमा दल दर्ताका निवेदन दिएकोसामाजिक सञ्जाल ट्विटरमार्फत जानकारी दिएका छन् ।
दल दर्ताका लागि नेकपा नेता खिमलाल देवकोटालगायत नेता बिहीबार बिहान आयोग पुगेका थिए । दर्ता निवेदनउपर अब आयोगले आवश्यक कारबाही गरेर दल दर्ता गर्नेछ ।
‘आगामी मंसिरमा हुने उपनिर्वाचनका लागि नेपाल कम्युनिष्ट पार्टी (नेकपा) का तर्फबाट दल दर्ताको निवेदन भर्खरै निर्वाचन आयोगमा प्रस्तुत गरिएको छ । सहकर्मी खिमलाल देवकोटा, ईश्वरी रिजाल, श्रीरामजी ढकाल र बाबुराम दहालजीलाई धन्यवाद’, मन्त्री ज्ञवालीले ट्विटमा भनेका छन् ।
नेकपा गत २०७४ मा सम्पन्न निर्वाचनपछि तत्कालीन नेकपा एमाले र माओवादी केन्द्र मिलेर एकीकृत भएको थियो । निर्वाचनपछि दर्ता भएका पार्टी आयोगमा दर्ता गर्नुपर्ने प्रावधानअनुरूप उपनिर्वाचनका लागि नेकपाले दल दर्ताको निवेदन दिएको हो ।
निर्वाचनपछि संघीय समाजवादी फोरम र नयाँ शक्ति मिलेर समाजवादी पार्टी र विवेकशील साझा दल पनि गठन भएका छन् । यी दलले पनि आगामी निर्वाचनमा सहभागिताका लागि दल दर्ता गर्नुपर्नेछ ।
विभिन्न कारणले प्रतिनिधिसभा, प्रदेशसभा र स्थानीय तहमा रिक्त ५० स्थानमा आगामी मंसिर १४ गते उपनिर्वाचन हुँदैछ ।
बुधबार बसेको नेकपाको सचिवालय बैठकले दल दर्ताका लागि आवश्यक काम गर्ने जिम्मेवारी महासचिव विष्णु पौडेललाई दिएको थियो ।
