यसरी फायर खोल्ने भए गच्छेदारले कांग्रेसमा

 

क्रियाशील सदस्यता, महाधिवेशन प्रतिनिधि, महासमिति सदस्य र ईकाईदेखि केन्द्रसम्म आफूले चाहेअनुसार नभए पार्टी ब्रेक गर्ने चुनौति नेतृत्वलाई दिईरहेका नेपाली कांग्रेसका विजयकुमार गच्छेदार समूहको व्यवस्थापन पार्टी सभापति शेरबहादुर देउवाको लागि टाउको दुखाई र तनवाको विषय बनेको छ ।

आफूलाई भन्दा अर्का उपसभापति विमलेन्द्र निधीलाई बढी विश्वास गरेकोमा समेत गच्छेदार देउवासँग असन्तुष्ट छन् । गत आम निर्वाचनको पूर्व सन्ध्यामा गच्छदार नेतृत्वको मधेसी जनाधिकार फोरम (लोकतान्त्रिक) नेपाली कांग्रेसमा सशर्त विलय भएको थियो । तर ती शर्तहरु पालनामा ढिलाई हुँदै गएपछि गच्छदार समूह असन्तुष्ट बनेको बताईन्छ ।

समायोजनले पूर्णता नपाएसम्म नेपाली कांग्रेसद्वारा आयोजना हुने कुनै पनि कार्यक्रममा भाग नलिने भन्दै गच्छदार समूहले कांग्रेस नेतृत्वलाई चेतावनी दिएको छ ।

स्रोतका अनुसार पार्टी एकीकरणका बेला गच्छदारले आफ्नो समूहबाट २५ हजारको नामावली पठाएका नेतृत्वलाई बुझाएका छन् । यो नामावलीलाई छनविन गर्ने निर्णय नेपाली कांग्रेसले यसअघि नै गरिसकेको छ । यसैगरी निकट भविष्यमा हुन गइरहेको वडा समिति तथा पालिका समिति गठनमा गच्छेदारका क्रियाशील सदस्यहरुले भाग लिन पाउने कि नपाउने ? भन्ने मुद्दा पनि धेरै पेचिलो बन्दै गएको छ ।

नेपाली कांग्रेसका अधिकांश नेताहरुले आगामी १४ औं महाधिबेशनको प्रयोजनका लागि हुने वडा तथा पालिका महाधिबेशनमा मात्रै गच्छेदारका क्रियाशील सदस्यहरुले भाग लिन पाउने अडान राख्दै आएका छन् । सभापति देउवा पनि यही अडानको पक्षमा छन् । यस विषयमा समेत गच्छेदारले चर्को असन्तुष्टि व्यक्त गरेका छन् । गच्छदारलाई पार्टी उपसभापति तथा संसदीय दलको उपनेता बनाउने तर अन्य नेता कार्यकर्ताले भने १४ औं महाधिबेशनसम्म पर्खनु पर्ने अवस्था उत्पन्न भएपछि असन्तुष्टि बढेको गच्छेदार निकट एक सदस्यले बताए । उनले गच्छेदार समूहको माग सम्बोधन नभए पार्टीमा रहने कि नरहने भन्ने विषयमा आफूहरु छलफलमा रहेको बताए ।

यदि प्रधानमन्त्री केपी शर्मा ओलीले ‘गच्छदारसँग लागेर कांग्रेस फुटाउ तिमीहरुलाई मन्त्री बनाइदिन्छु’ भनेर बचन दिने हो भने गच्छदार सफल हुने अवस्था छ । भित्रभित्रै गच्छेदारले यो गृहकार्य गरेको हुनसक्ने अनुमान पनि गरिएको छ । त्यस्तै समाजवादी पार्टीका अध्यक्ष समेत रहेका उपप्रधानमन्त्री उपेन्द्र यादवसँग पनि गच्छेदारको बाक्लो भेटघाट र कुराकानी भईरहेको छ ।

तथापी गच्छेदारको यो असन्तुुष्टि कुन बेला कसरी प्रकट हुन्छ, हेर्न बाँकी छ । गच्छेदारको असन्तुष्टि अभिव्याक्तिमा नभएर ‘एक्सन’ मार्फत प्रकट हुने गरेको विगतको नजीरलाई हेर्दै कतिपयले कडा कदम चाल्न सक्ने बताउछन् । कुनैबेला गिरिजाप्रसाद कोइरालाका अत्यन्त निकटस्थ रहेका गच्छेदार कोइरालाले छोरी सुजातालाई अघि सारेपछि असन्तुष्ट बनेका थिए ।

यो असन्तुष्टि अभिव्यक्तिको माध्यमबाट प्रकट मात्र गरेनन् एकाएक शेरबहादुर देउवा पक्षमा लागेर कोईरालालाई चक्मा दिए । त्यसो त शेरबहादुर देउवासँग पनि उनको लामो समयसम्म सहकार्य चलेन । देउवासँगै पार्टीमा रहँदा पनि गच्छेदारले आफ्नो असन्तुष्टिलाई अभिव्यक्तिबाट नभएर ‘एक्सन’बाटै जवाफ फर्काउदै उनले सभापति देउवाविरुद्ध संसदीय दलको नेता पदमा उमेदवारी दिन पुगे ।

२०६४ सालको संविधानसभा निर्वाचनमा गच्छेदारलाई कोइराला र देउवाले टिकट वितरण गर्ने समितिमा राखेनन् । त्यसपछि असन्तुष्ट गच्छदारले कोइराला र देउवा दुवैलाई आफ्ना १५ जनाको लिष्ट बुझाउँदै भने– यिनीहरुले टिकट पाउनु पर्छ । तर कोइराला र देउवाले १५ मध्ये पाँच जनालाई मात्रै टिकट दिए । तत्काल गच्छेदारले फायर खोले कांग्रेसको ठूलै जत्था लिएर उपेन्द्र यादव नेतृत्वको मधेसी जनाधिकार फोरम प्रवेश गरे । आफूले भनेका १५ जनालाई नै फोरमबाट टिकट दिलाएर चुनाव समेत जिताए ।

यसरी एक्सनबाट आफ्नो असन्तुष्टि प्रकट गर्ने गच्छेदारले यतिबेलाको आफ्नो असन्तुष्टिलाई देउवाले समयमै संवोधन नगरे अप्रिय निर्णय लिने चेतावनी सभापति देउवालाई दिइसकेका छन् । गच्छेदारको चेतावनी के होला ? नेपाली कांग्रेसभित्र यो प्रश्न निकै पेचिलो बनेको छ । गच्छेदार नेपाली कांग्रेस विभाजन गरेर बाहिरिन सक्ने अनुमान धेरैले गरेका छन् ।

तर पार्टी विभाजनका लागि ४० प्रतिशत सांसद चाहिन्छ । गच्छदार सँग ५ जना मात्रै रहेको छ । बाँकी २० जना कसरी जुटाउलान ? भन्ने प्रश्न महत्वपूर्ण हो । तर, नेपाली कांग्रेसका ६३ जना सांसदको सूचीमा उमेश श्रेष्ठ, विनोद चौधरी, सूर्यबहादुर केसी, कुमार खड्का जस्ता अवसरको खोजी गरिरहेकाहरुको संख्या निकै ठूलो छ ।

उता नेपाली कांग्रेसका प्रवक्ता विश्वप्रकाश शर्मा भने उपसभापति गच्छेदारका मागहरुलाई नेतृत्वले सकारात्मक ढंगले लिएको बताउछन् । उनले भने – उहाँले उठाएका विषयमा नेतृत्वबीच छलफल चलिरहेको छ । केन्द्रीय समितिको बैठकले आवश्यक निर्णय लिनेछ ।