केन्द्रीय प्रचार विभागका प्रमुख श्रेष्ठ र उपप्रमुख थापाले सम्हाले जिम्मेवारी
नेपाल कम्युनिष्ट पार्टी (नेकपा) केन्द्रीय प्रचार तथा प्रकाशन विभागको जिम्मेवारी औपचारिक रूपमा प्रमुख नारायणकाजी श्रेष्ठ र उपप्रमुख सूर्य थापाले ग्रहण गर्दै कार्य थालनी गर्नुभएको छ । पेरिसडाँडास्थित पार्टी केन्द्रीय कार्यालयको दिवाकर हलमा बुधबार पार्टी अध्यक्ष पुष्पकमल दाहाल ‘प्रचण्ड’को प्रमुख आतिथ्यतामा आयोजित हस्तान्तरण कार्यक्रममा पूर्ववर्ती नेकपा (एमाले) का प्रचार प्रमुख योगेश भट्टराई, उपप्रमुख सूर्य थापा र सचिव विष्णु रिजाल तथा नेकपा (माओवादी केन्द्र) का प्रचार प्रमुख पम्फा भुसालले आआफ्नो अनुभवसहित नयाँ कार्यविभाजन अन्तर्गत विभागीय जिम्मेवारी हस्तान्तरण गर्नुभयो । साथै, आफ्नो कार्यकालमा गरेको योगदानका निम्ति उहाँहरूलाई प्रमुख र उपप्रमुखद्वयले विदाई र अन्य जिम्मेवारीमा सफलताको शुभकामना प्रदान गर्नुभयो ।
सो अवसरमा पार्टी अध्यक्ष पुष्पकमल दाहाल ‘प्रचण्ड’ ले यतिबेला स्वतन्त्रता र अनुशासन तथा लोकतन्त्र र अधिनायकत्वबीच सन्तुलित सम्बन्ध र व्यवहार गर्न आवश्यक रहेकोमा जोड दिनुभयो । र, योजनाबद्ध प्रचार कार्य व्यवस्थित गर्नुपर्ने आवश्यकता औल्याउँदै नयाँ जिम्मेवारी सफलताका साथ बहन गर्न शुभकामना दिनुभयो ।
बैठकमा वरिष्ठ नेता तथा पूर्वप्रधानमन्त्री झलनाथ खनाल, युवराज ज्ञवाली, प्रदिप नेपाल, अग्नि सापकोटा, पम्फा भुसाल, रघुजी पन्त, प्रेस संगठन नेपालका ईन्चार्ज राजेन्द्र गौतम, सह इन्चार्जद्वय महेश्वर दाहाल(संयोजक) र ओम शर्मा तथा सहसंयोजक गणेश वस्नेतलगायतले आआफ्ना सुझाव र शुभकामना दिनुभएको थियो ।
उक्त बैठकमा पार्टी नियमावली २०७५ ले विभागलाई प्रदान गरेको कार्य क्षेत्रको चर्चा गर्दै उपस्थित नेतागणलाई स्वागत गर्दै उपप्रमुख सूर्य थापाले बैठक थालनी र संचालन गर्नुभएको थियो । बैठकको अध्यक्षता गर्दै प्रमुख कमरेड नारायणकाजी श्रेष्ठले पार्टी अध्यक्ष, वरिष्ठ नेतासहित बैठकमा सहभागी सबै आमन्त्रित व्यक्तित्वहरूलाई शुभकामना, निर्देशन र मार्गदर्शनका निम्ति धन्यवादका साथ विभागले योजनाबद्ध र सुव्यवस्थित रूपमा काम गर्ने स्पष्ट पार्नुभयो ।
