हाम्रो इकोनोमि
बारा र पर्सामा हावाहुरी (टोर्नाडो) प्रभावितका लागि नेपाली सेनाले बनाइदिएको घर बुधबार हस्तान्तरण गरेको छ । प्रधानसेनापति पूर्णचन्द्र थापा, कार्यवाहक प्रधानमन्त्री एवं रक्षामन्त्री ईश्वर पोखरेल र प्रदेश २ का मुख्यमन्त्री लालबाबु राउतले सम्बन्धित स्थानीय सरकार प्रमुखलाई हस्तान्तरण गरेका हुन् ।
वीरगञ्जमा आयोजित कार्यक्रममा हस्तान्तरणका लागि नमुना घर प्रयोग गरिएको थियो । ०७५ चैत १७ गते आएको हावाहुरीबाट घर पूर्ण क्षति भएका ८ सय ६९ वटा परिवारको घर निर्माण गरेको नेपाली सेनाको जनता आवास निर्माण कार्यदलका कमाण्डर विनयविक्रम राणाले जानकारी दिए ।
सेनाले वर्षायामअघि नै घर निर्माण सक्ने लक्ष्य राखे पनि अविरल बर्षा, निर्माण सामाग्री समयमा उपलब्ध नभएको, सडक राम्रो नभएको र विवादित घरहरुको कारणले समयमा काम नसकिएको जनाएको छ ।
प्रमाणीकरण पछि घटे लाभग्राही
नेपाल सरकारले नेपाली सेनालाई पूनः निर्माणको जिम्मा दिएपछि नेपाली सेनाले पर्सा र बारामा १२ वटा क्लस्टर बनाएर काम शुरु गरेको थियो । जग खन्ने, छानोसम्म ब्लक लगाई झ्याल ढोका हाल्ने, ट्रस जडान गरेर छानो हाल्ने र घरको फिनिसिङ गरेर घर निर्माण सम्पन्न गर्ने गरी चार चरणमा सेनाले काम गरेको थियो ।
प्रभावितका लागि २ वटा कोठा, एउटा शौचालय, सानो भान्साकोठा र बरण्डा भएको ३ सय ४८ दशमलव ६ वर्गफिटको आकर्षक घर निर्माण भएको छ । जग्गा नपुग हुनेलाई विभिन्न ५ डिजाइनका घर बनाइएको र जग्गा नभएकालाई स्थानीय सरकारसँग समन्वय गरेर घर निर्माण गरिएको नेपाली सेनाले जनाएको छ ।
शुरुमा ५ सय घर पूर्ण क्षति भएको अनुमान गरी वर्षायाम अगावै निर्माण गरिदिने गरी नेपाली सेनालाई जिम्मा लगाए पनि पछि १४ सय ५३ घर पूर्ण क्षति भएको विवरण आएको थियो । ०७६ साउन २६ गतेसम्म तीन चरणमा १४ सय ५३ वटै घर निर्माण गर्ने योजना अनुसार तयारी गरिएको थियो । ०७५ चैत २१ गते बसेको मन्त्रिपरिषद बैठकले हावाहुरीबाट क्षति भएका घर पुनःनिर्माण गर्न सेनालाई जिम्मा दिएको थियो ।
तर वास्तविक पीडित छुटेको गुनासो आएपछि सम्बन्धित जिल्लाका प्रमुख जिल्ला अधिकारी नेतृत्वको टोलीले छानबिन गरेको थियो । सबै क्लस्टरमा क्षति भएको घर पुन प्रमाणिकरण गर्दा ४८ प्रतिशत घर संख्या घटेको नेपाली सेनाले जनाएको छ ।
दर्ता छुट भएका प्रभावितको निवेदन संकलन, स्थानीय जनप्रतिनिधि, क्लस्टर कमाण्डर र स्थानीय प्रहरी प्रमुखको टोलीले प्रमाणीकरण गर्दा २ सय २ जना वास्तविक पीडित छुटेको पाइएको थियो ।
विनियोजित रकममा ५३ प्रतिशत बचत
घर निर्माण गर्दा विनियोजित रकममा ५३ दशमलब ८३ प्रतिशत बचत भएको नेपाली सेनाले जनाएको छ । विभिन्न जनहितको कार्यसमेत समावेश गरी शुरुमा विनियोजित रकमबाट आधा खर्चमा काम पुरा भएको दावी उसले गरेको छ ।
नेपाली सेनाको निर्माण कार्यदलले दिएको जानकारी अनुसार सेनालाई १४ सय ५३ घर बनाउन सरकारले ८२ करोड १८ लाख ९० हजार ३ सय ४३ रुपैयाँ निकासा गरेको थियो । तर ८६९ वटा मात्रै घर निर्माण गरिएपपछि रकम वचत भएको हो ।
घर निर्माणमा ४४ करोड २४ लाख ५५ हजार ८ सय ९६ रुपैयाँ खर्च हुने देखिएको कार्यदलका कमाण्डर विनयबिक्रम राणाले बताए । मन्त्रिपरिषदले एउटा घर निर्माण गर्न ५ लाख ४५ हजार ९ सय ८५ रुपैयाँ ८८ पैसा छुट्याए पनि ४ लाख ८४ हजार ८ सय ८८ रुपैयाँ लागेको उनले बताए ।
