संविधान दिवसमा माेदी नेपाल नआउने
भारतीय प्रधानमन्त्री नरेन्द्र मोदीले नेपालको संविधान दिवसमा अतिथि बनेर आउन नसक्ने जवाफ पठाएका छन् । नेपालका प्रधानमन्त्री केपी शर्मा ओलीले मोदीलाई भारतीय विदेशमन्त्री एस जयशंकरमार्फत संविधान दिवसको प्रमुख अतिथि बन्न पठाएका निम्तोलाई मोदीले आउन नसक्ने जानकारी गराएका हुन् ।
२०७२ असोज ३ गते नेपालको संविधान जारी भएको अवसर पारेर असोज ३ गते चौंथो संविधान दिवस मनाइँदै छ । संविधानका कतिपय प्रावधानमा असनतुष्टि प्रकट गर्दै तत्काल संविधान जारी नगर्न नरेन्द्र मोदीले भारतका तत्कालीन विदेश सचिव एस. जयशंकरमार्फत सन्देश पठाएका थिए ।
जयशंकरले संविधान जारी गर्ने दिन सार्न भनेका समेत थिए । तर मोदीको सन्देश बोकेर आएका जयशंकरलाई सबैभन्दा कडा जवाफ ओलीले दिएका थिए ।
भारतको आग्रहलाई बेवास्ता गर्दै नेपालका राजनीतिक दलहरूले संविधान जारी गरे । लगत्तै भारतले नेपालमाथि नाकाबन्दी लगायो । झन्डै ६ महिना नाकाबन्दी चल्यो ।
