नेपालबाट कम्युनिस्टलाई सदाका लागि सिध्याउनुपर्ने समय आयो : सभापति देउवा
प्रमुख प्रतिपक्षी दल नेपाली कांग्रेस अहिले देशव्यापी अभियानमा निस्केको छ । सभापति शेरबहादुर देउवाले देश ‘कम्युनिस्ट स्टेट’ (कम्युनिस्ट शासन व्यवस्था) तिर अघि बढेको बताउनु भएको छ ।
विचार तथा अभिव्यक्ति स्वतन्त्रा, प्रेस स्वतन्त्रता, राजनीतिक अधिकारजस्ता लोकतन्त्रका आधारभूत मान्यतामाथि धावा बोल्दै सरकारले साम्राज्यवादी शैली अंगिकार गरेको उहाँको आरोप छ ।
सुर्खेतमा हिजो आयोजित पार्टीको प्रादेशिक प्रशिक्षण कार्यक्रममा उहाँले भन्नुभयो, ‘‘जताततै डर–त्रास छ, पत्रकारले समेत स्वतन्त्रपूर्वक लेख्न पाउने अवस्था छैन ।
अरू त अरू, मानव अधिकार आयोगमाथि समेत हस्तक्षेप भएको छ । अब कहाँ रह्यो लोकतन्त्र ?’ सरकारको कार्यशैलीले देशमा खतराको संकेत देखिएको उहाँले आशंका व्यक्त गर्नुभयो ।
सभापति देउवाले यस्तै अवस्थाबाट देश अघि बढे कांग्रेसले पूर्ण लोकतन्त्रका लागि अन्तिम लडाइँ लड्नुपर्ने अवस्था आउन सक्ने उललेख गर्नुभयो । २००७ सालयताका हरेक आन्दोलन पूर्ण लोकतन्त्रका लागि भए पनि त्यसअनुरूप जनताले प्रत्याभूति गर्न नपाएको उहाँको दाबी छ ।
पूर्ण लोकतन्त्रका लागि संघीय गणतन्त्र ल्याए पनि सरकारले संघीयता र गणतन्त्रमाथि नै धावा बोलिरहेको आरोप उहाँको छ । उहाँले अब नेपालबाट कम्युनिस्टलाई सदाका लागि सिध्याउनुपर्ने समय आएको भन्दै अन्तिम लडाइँका लागि तयार रहन सबैलाई अपिल गर्नुभयो ।
