मौद्रिक नीति आज ४ बजे, कुन–कुन विषय समेटिँदै छन् ?

 

 

नेपाल राष्ट्र बैंकले २०७६/७७ को मौद्रिक नीति बुधबार अपराह्न ४ बजे सार्वजनिक गर्ने भएको छ । असार अन्तिम साता सार्वजनिक गरिने भनिएको मौद्रिक नीति ‘प्राविधिक कारण’ले रोकिएको थियो । बुधबार बिहान बसेको राष्ट्र बैंक सञ्चालक समिति बैठकले आजै सार्वजनिक गर्ने निर्णय गरेको हो । गत वर्ष भने असार २६ गते सार्वजनिक गरिएको थियो ।

राष्ट्र बैंकले बैंक तथा वित्तीय संस्थामा ब्याजदर स्थायित्व कायम गर्ने नीति लिएको छ । यसअघि नेपाल बैंकर्स संघले ब्याजदर स्थायित्व, स्प्रेडदर, आन्तरिक ऋणपत्रलगायत विषयमा दुई दर्जनभन्दा बढी सुझाव दिएको थियो । अबको नीतिले आर्थिक वृद्धिदरलाई सघाउ पु¥याउन सहायता गर्न कृषि क्षेत्रलाई प्रोत्साहन गर्ने भएको छ । यसअघि पनि बैंकहरूले अनिवार्य रुपमा कृषिमा १५ प्रतिशत, पर्यटन र ऊर्जामा १० प्रतिशत कर्जा प्रवाह गर्ने नीति लिएका थिए । यसलाई नै साथ दिने गरी अबको मौद्रिक नीति सार्वजनिक गर्न लागिएको राष्ट्र बैंक उच्च स्रोतले जनाएको छ । बैंकर्स संघले प्राथमिकताप्राप्त कर्जामा सहुलियत दिन र अपुग भएको रकममा हर्जानाको सट्टा नपुग रकम सरकारी ऋणपत्रमा अनिवार्य लगानीमा जोड दिन सुझाव दिएको थियो ।

‘बैंक तथा वित्तीय संस्था, उद्योगी व्यवसायीका संघसंगठनलगायतले व्यक्तिगत स्वार्थ बाझिने गरी दिएको सुझावलाई नीतिले समेटेको छैन’, स्रोतले भन्यो । मौद्रिक नीति ल्याउनुपूर्वको छलफलमा १० बुँदामा आधारित हुने बताइएको थियो । यसैअनुरुप बाह्य तथा वित्तीय क्षेत्र र मूल्य स्थायित्व कायम गर्न, भुक्तानी प्रणाली आधुनिकीकरण, वित्तीय स्रोत व्यवस्थापन र वित्तीय क्षेत्र सुदृढीकरणका लागि आगामी मौद्रिक नीतिले जोड दिएको राष्ट्र बैंकले बताएको छ । साथै केन्द्रीय बैंकले कर्जा निक्षेप सन्तुलन गर्ने रणनीति लिएको स्रोतले बताएको छ । यसअघि नेपाल वित्तीय संस्था संघले कर्जा–पुँजी, निक्षेप (सीसीडी) अनुपात ८० प्रतिशतबाट मर्जर वा एक्विजिसन भएको बैंकलाई १ वर्षसम्मका लागि ८५ प्रतिशत पु¥याउन सुझाव दिएका थिए ।