बलात्कारीलाई नपुसंक बनाउन सुई दिइने विधेयक पारित
नेपालमा अहिले बलात्कार एकदमै ठुलो चुनौतीको रुपमा देखिएको छ । भारतमा पनि बलात्कारका घटना लगातार बढ्दै गएका छन् । यो बिचमा अमेरिकाको अल्बामा राज्यका गभर्नर काय इवेले मंगलबार बलात्कार रोक्न एक विधेयकमा हस्ताक्षर गरेकी हुन् । विधेयकमा १३ वर्षभन्दा कम उमेरका बालिकामाथि यौन दूराचार गर्ने पुरुषलाई सुईमार्फत नपुंसक बनाउने प्रावधान राखिएको छ ।
सुईद्वारा नपुंसक बनाउने यस्तो प्रक्रियालाई चिकित्सकिय भाषामा ‘केमिकल कास्ट्रेसन’ भनिन्छ । सुई प्रयोग गर्न नमान्ने बलात्कारीलाई जेलबाट मुक्त नगरिने पनि विधेयकमा उल्लेख छ ।
यस्तो सुई भने दोषी आफैंले किन्नुपर्नेछ । तर, यस्तो सुई प्रयोग गर्ने अन्तिम निर्णय भने न्यायाधिशले गर्नेछन् । अलाबामा राज्यमा १ सेप्टेम्बर २०१९ देखि यो कानून लागू हुने बताइएको छ । अमेरिकाका ७ राज्यमा बाल यौन दुराचारीलाई यस्तो सुई दिने प्रावधान छ ।
