हाम्रो इकोनोमि

 

सरकारले प्रतिबन्ध लगाएको नेत्रविक्रम चन्द्र ‘विप्लव’ नेतृत्वको नेपाल कम्युनिस्ट पार्टी (नेकपा)ले काठमाडौं उपत्यका आसपासका जिल्लाहरूमा सशस्त्र तालिम र गतिविधिहरू गरिरहेको रहस्य बाहिर आएको छ ।

 

काभ्रे, ललितपुर, मकवानपुर, धादिङ, नुवाकोट, सिन्धुपाल्चोकसहितका जिल्लाहरूमा नेकपाका महासचिव विप्लवले तालिम चलाएका हुन् । यी जिल्लाका दुर्गम गाउँहरूमा हतियारसहित तालिम गर्ने गरेको प्रत्यक्षदर्शीहरू बताएका छन् । विप्लव समूहले ललितपुर र मकवानपुरका विकट तथा दुर्गम गाउँहरूलाई आफ्नो केन्द्र बनाउन थालेका छन् ।

 

ती जिल्लाको दुर्गम गाउँ र भौगोलिक विकटताका कारण सुरक्षा निकायको ध्यान जान सकेको छैन । सोही अवसर छापेर विप्लवको नेकपाले आफ्ना सैन्य तालिम र गतिविधिहरूलाई सक्रिय बनाएको हो । बन्दोबस्तीका सामानहरू विप्लव समूहले काठमाडौं उपत्यकाबाटै लैजाने गरेको उच्च स्रोतले जनाएको छ ।

 

दुई हप्ता अगाडि सोलुखुम्बुमा पनि विप्लवका कार्यकर्ताहरू देखिएको र प्रहरी चौकी आक्रमण गर्न आएको भनेर समाचार बाहिर आएका थिए । चौकी आक्रमण नभएपनि विप्लवका कार्यकर्ताहरूले सो क्षेत्रमा तालिम लिएको प्रत्यक्षदर्शीहरूको भनाइ उदृत गर्दै समाचार आएका थिए ।

 

महासचिव विप्लवले सुरक्षा निकायलाई आक्रमण गर्ने कुनै नीति नरहेको जनाए पनि विकट गाउँहरूमा भइरहेका सशस्त्र तालिम र गतिविधिहरूले विभिन्न आशंकाहरू उब्जाएको छ । सरकारले विप्लव समूहको यस्तै गैर कानूनी गतिविधिको सूचना पाएर नै प्रतिबन्ध लगाएको हुन सक्ने टिप्पणी हुन थालेका छन् ।

 

कास्की जिल्लामा विप्लवका १८ जना कार्यकर्ता पक्राउ

कास्कीको अन्नपूर्ण गाउँपालिकाबाट नेत्रविक्रम चन्द विप्लव समूहका जिल्ला सेक्रेटरी सहित १८ नेताकार्यकर्तालाई प्रहरीले पक्राउ गरेको छ । अन्नपूर्ण गाउँपालिका–११ उरीबाट शनिबार राती कार्यकर्ता नियन्त्रणमा लिइएको जिल्ला प्रहरी कार्यालय कास्कीका प्रमुख तथा प्रहरी उपरीक्षक दानबहादुर कार्कीले जानकारी दिए ।

 

पक्राउ पर्नेहरूमा विप्लव समूहका कास्की सेक्रेटरी आक्रोश भनिने विवेक भण्डारी, विद्यार्थी संगठनका जिल्ला अध्यक्ष काजी गुरुङ, केन्द्रीय सदस्य मिलन राईसँगै पार्टीका जिल्लास्तरीय नेता तथा विद्यार्थी संगठनका नेताकार्यकर्ताहरु रहेका छन् ।

केही दिनयता विप्लव समूहको गतिविधि यो क्षेत्रमा बढेको सूचनाका आधारमा प्रहरीले निगरानी गरिरहेको र आमा समूहको भवनबाट साँझ ६ बजे नियन्त्रणमा लिइएको प्रहरीले जनाएको छ । उनीहरूलाई शनिबार राति नै जिल्ला प्रहरी कार्यालय कास्कीमा ल्याइएको छ ।