मोरङमा बालिकालाई बन्धक बनाएर रातभर बलात्कार
मोरङको उर्लाबारी नगरपालिका–३ थापा चौकका जेम्स क्षेत्री, रेगन तथा रेवत भनेर चिनिने २५ वर्षीय चन्द्रमणि आचार्यले एक बालिकालाई आफ्नै घरमा बन्धक बनाएर बलात्कार गरेको घटना सार्वजनिक भएको छ ।
लेटाङ नगरपालिका घर भएकी १३ वर्षीय बालिकालाई उर्लाबारीस्थित घरमै लगेर रातभर बलात्कार गरेको घटना तीनदिनपछि सार्वजनिक भएको हो । बलात्कारमा संलग्न आचार्यलाई भागेर मोरङकै मिक्लाजुङ गाउँपालिकामा पुगेको अवस्थामा पक्राउ गरिएको इलाका प्रहरी कार्यालय उर्लाबारीका प्रहरी निरीक्षक रामप्रसाद तिमल्सिनाले जानकारी दिए ।
‘गिफ्ट’ ल्याइदिएको छु भन्दै मोरङको कानेपोखरीमा बोलाएर आफ्नो मोटरसाइकलमा राखेर आचार्यले बालिकालाई आफ्नै घरमा पु¥याएको प्रहरीको अनुसन्धानबाट खुलेको छ । प्रहरीका अनुसार रेडियो कार्यक्रममार्फत बालिका र आचार्यबीच चिनजान भएको थियो । त्यही चिनजानका आधारमा आचार्य गत शुक्रबार बालिकालाई भेट्न भन्दै लेटाङमै पुगेको र त्यही क्रममा दुई जनाबीच पहिलो भेटघाट भएको प्रहरीको भनाइ छ । तिमल्सिनाका अनुसार भेटघाट भएको भोलीपल्ट शनिबार फोन गरेर ‘गिफ्ट’ ल्याइदिएको छु भन्दै आचार्यले कानेपोखरीमा बोलाएको अनुसन्धानका क्रममा खुलेको छ ।
कानेपाखेरीमा भेट भएपछि साथमा ‘गिफ्ट’ ल्याउन विर्सिएको भन्दै आचार्यले फकाएर आफ्नै घरमा पु¥याएर रातभर बन्धक बनाएर बलात्कार गरेको प्रहरीको भनाइ छ । घटना भएको रात आचार्यका घरमा परिवारका सदस्य कोही नभएको पाइएको छ । केही खानेकुरा मिसाएर पानीमा खान दिएपछि बालिका बेहोस भएको र त्यसपछि आचार्यले रातभर बलात्कार गरेको तिमल्सिनाले बताए ।
प्रहरीका अनुसार बलात्कारबाट पीडित भएकी बालिका मानसिक रुपमा विक्षिप्त बनेकी छिन् । जतिबेला पनि चिच्याउने, रुने र कराउने मात्रै गर्ने गरेको प्रहरीको भनाइ छ । बलात्कार पीडित बालिकाको कोसी अञ्चल अस्पताल विराटनगरमा स्वास्थ्य परीक्षण र उपचार गरिएको प्रहरीले जनाएको छ । मंगलबार पक्राउ परेका आचार्य विरुद्ध मुलुकी अपराध (संहिता) ऐन २०७४ बमोजिम जवरजस्ती करणीको मुद्दा चलाउन अदालतबाट म्याद थप गरेर अनुसन्धान सुरु गरिएको प्रहरीले जनाएको छ ।
