ओली र राउतको राष्ट्रघाती सम्झौता बिरुद्ध काँग्रेसले आन्दोलन गर्छ देउवाले

सिके राउतले कसरी बोलिरहेका छन्, त्यतातिर हेर्न देउवाले आग्रह गरे । ओली सरकारले संघीयतालाई कमजोर बनाउने काम गरिरहेको देउवाले बताए । ‘प्रजातन्त्रको खिलापमा अधिनायकवाद ल्याउँदै छ ओली सरकार,’ देउवाले भने ।

प्रतिपक्ष कमजोर भयो भन्ने पत्रकारको सवालको देउवाले प्रतिकार गरे । ‘भोट हाल्ने बेलामा एमालेलाई हाल्ने अनि कांग्रेस कहाँ गयो, कहाँ गयो भन्ने ?,’ देउवाले भने, ‘हामी एमालेजस्तो तीन महिना संसद नै चल्ने नदिने पार्टी त होइनौं नि । अब सशक्त आन्दोलन गर्छौं ।’

कस्तो सशक्त आन्दोलन भन्ने कुरा गरेपछि थाहा हुने उनको भनाइ थियो । ओली प्रधानमन्त्री भएको एक वर्ष बितिसक्दा एउटा पनि देखाउनलायक राम्रो काम नगरेको देउवाले दाबी गरे । फौजदारी संहिताको नाममा प्रजातन्त्र र प्रेसलाई नियन्त्रण गर्ने र अधिनायकवादमा लैजाने काम गरिरहेको उनको आरोप छ ।

कार्यक्रममा पोखराको गण्डकी मेडिकल कलेजको प्रश्न आउनेबित्तिकै देउवा एकाएक जंगिए । डा. गोविन्द केसीको मागका विषयलाई लिएर सडक आन्दोलन गरेको कांग्रेस पाँच सयभन्दा बढी विद्यार्थीले लामो समयदेखि गरिरहेको आन्दोलनप्रति भने किन मौन छ ? भन्ने प्रश्न पत्रकारहरुले सोधेका थिए ।

कलेजका सञ्चालक खुमा अर्यालसँग पनि कांग्रेस र देउवालाई समेत जोड्न थालिएको पत्रकारको प्रश्नपछि देउवाले आक्रोशित हुँदै भने, ‘कहाँबाट आयो त्यो कुरा ? मैले के बोल्नुपर्‍यो ? म किन जोडिने ? चिकित्सा विधेयक नै मैले ल्याएको होइन ? एमालेको बोर्डर नायकलाई किन भएन कारबाही ? सबैलाई हुनुपर्‍यो नि ।’ कार्यक्रममा सहभागी कांग्रेसका अन्य नेताले भने सभापति देउवालाई त्यो कुरा थाहा नभएको बताउँदै विषयान्तर गरेका थिए ।