शिक्षकबाटै १६ वर्षीया छात्रा बलात्कृत, यस्तो छ किशोरीको उजुरीमा
रुकुमका एक शिक्षकले आफैले पढाउने एक १६ वर्षीया छात्रालाई बलात्कार गरेका छन् ।
आफ्नै शिक्षकले बलात्कार गरेको छात्राको उजुरीपछि जिल्ला प्रहरी कार्यालय रुकुम (पश्चिम) ले २३ बर्षीय शिक्षक प्रकाश खड्कालाई पक्राउ गरेको छ ।
शिक्षक खडका जिल्लाको सानीभेरी गाउँपालिकामा रहेको राप्ती ज्ञानोदय माविका शिक्षक हुन् ।
उक्त विद्यालयमा पशु प्राविधिक विषय पढ्दै गरेकी १६ वर्षीया किशोरीलाई बलात्कार गरेको आरोपमा पक्राउ गरिएको जिल्ला प्रहरी कार्यालय रुकुम (पश्चिम) का प्रहरी निरीक्षक प्रमोदकुमार क्षेत्रीले जानकारी दिएका छन् ।
सोही विद्यालयमा पशु प्राविधिक पढाउँदै आएका खड्काले बालिकालाई बलात्कार गरेको भन्दै पीडितले उजुरी दिएपछि पक्राउ गरिएको प्रहरीले जनाएको छ ।
गएको मंगलबार गाउँमा भैंसी बिरामी भएको र त्यसको उपचार गर्न भन्दै बालिकालाई मोटरसाइकलमा राखेर गएका शिक्षक खडकाले एकान्त जङ्गलमा लगि बलात्कार गरेको पीडितले प्रहरी समक्ष दिएको उजुरीमा जनाइएको छ ।
पक्राउ परेका शिक्षकलाई प्रहरी हिरासतमा राखेर घटनाबारेमा थप अनुसन्धान भइरहेको प्रहरी निरीक्षक क्षेत्रीले जानकारी दिएका छन् ।
