बस दुर्घटना अपडेट : मृत्यु हुने यात्रुको संख्या ७ पुग्यो, २ गम्भिर बिरामी हेलिकोप्टरबाट काठमाडौं ल्याइयो
पर्वतको कुश्मा नगरपालिका मालढुंगामा बस दुर्घटना हुँदा सात जनाको मृत्यु भएको छ भने, ३१ जना घाइते भएका छन् ।
म्याग्दी जिल्लाको बेनीबाट चितवनको नारायणगढतर्फ जाँदै गरेको ग१ख ६१०८ नं को बस पर्वत कुश्मा नगरपालिका–१ मालढुङ्गामा दुर्घटना भएको हो ।
जिल्ला प्रहरी कार्यालय बागलुङको अनुसार मृतकको सङ्ख्या बढ्न सक्ने रहेको छ ।
घाइतेमध्ये गम्भीर दुई जनाको हेलिकप्टरबाट थप उपचारका लागि काठमाडौँको ग्राण्डी अस्पताल लगिएको छ भने थप तीन जनालाई उपचारका लागि काठमाडौँ पठाउन हेलिकप्टरको व्यवस्था गर्न नेपाली सेनालाई आग्रह गरिएको बागलुङ नगरपालिकाका प्रमुख जनकराज पौडेलले बताए ।
अन्य घाइतेहरुको धौलागिरि अञ्चल अस्पतालमा उपचार गरी थप उपचारका लागि एम्बुलेन्समार्फत पोखराको मणिपाल अस्पताल पठाइएको जिल्ला प्रहरी कार्यालय बागलुङले जनाएको छ ।
मृतक तथा घाइतेको विवरण सङ्कलनको कार्य भइरहेको छ । दुर्घटनाको कारण भने अहिलेसम्म खुलेको छैन ।
