राजतन्त्र र ग्रेटर नेपालको पक्षमा अब चीन !

 

नेपाल-चीन पारस्परिक सहयोग समाजका अध्यक्ष प्रेमसागर पौडेलले चीन सरकार राजतन्त्रसहितको ग्रेटर नेपालको पक्षमा रहेको खुलसा गरेका छन् । चीनसँग निकट सम्वन्धका कारण चर्चामा रहेका अध्यक्ष पौडेलले पछिल्लो समय सामाजिक सञ्जाल फेसबुकमा पोष्ट गर्दै सो कुराको खुलसा गरेका हुन् ।

 

उनले भने,’अहिलेको बर्तमान ब्यवस्था जनता र मुलुकको विपक्षमा क्षेत्रीय स्थिरता र शान्ति खल्बल्याउने दुष्ट प्रयास गर्दै साम्राज्यवादीको दलालीमा नाङ्गो रुपमा लागेको देखिन थालेको छ । सतहमा देखिएका र निकट भविष्यमा देखिने काला दृश्यले नेपालको सार्वभौमसत्ता अखण्डता र एकतालाई नराम्रोसँग प्रभावित पार्ने छ ।’

 

‘सम्भावित खतरालाई रोक्न र क्षेत्रीय स्थिरता तथा शान्ति कायम गर्न पछिल्लोपटक प्रधानमन्त्री केपी ओलीको चीन भ्रमणका समय स्पष्ट शब्दमा चीनका राष्ट्रपति सीले नेपालको अखण्डता, सार्वभौमसत्ता र स्वतन्त्रताको पक्षमा चीन रहेको बताएका थिए,’ उनले भने, देशभक्त नेपाली जनता सो कुरा ब्यवहारमा देख्न आतुर छन् ।

 

क्षेत्रीय स्थिरता, अखण्डता र स्वतन्त्रता कायम गर्न चीनको अभिभावकीय भूमिका अपरिहार्य छ । चीनले ग्रेटर नेपाल र राजालाई पुर्नस्थापित गर्ने अजेण्डालाई समर्थन गर्नुपर्छ ।’

 

चीन सरकार र नेताहरुसँग निकट सम्वन्ध बनाएका पौडेलले उक्त कुरा सामाजिक सञ्जालमार्फत खुलसा गरेसँगै चीन सरकार पनि पूर्वराजा ज्ञानेन्द्रलाई पुर्नस्थापना गर्न आतुर रहेको स्पष्ट भएको छ । पौडेलका अनुसार चीन अब ग्रेटर नेपालको पक्षमा समेत उभिने छ ।

 

उनले ग्रेटर नेपाल कायम भएको खण्डमा मात्र क्षेत्रीय स्थिरता कायम हुने र नेपाललाई चीन विरोधी अखडा बन्नबाट बचाउन सकिने स्पष्ट धारणा राख्दै आएका छन् । जुन कुरा चिनियाँ शक्तिशाली राष्ट्रपति सी र उनको सरकारले समेत गम्भिरताका साथ लिएको बुझिएको छ ।

 

सामाजिक अभियन्ता समेत रहेका पौडेलले पूर्वीय सभ्यताको निरन्तरताबाट मात्रै मानवजीवन शान्त, सुमधुर, समृद्ध र विश्वभातृत्वका पक्षमा महत्त्वपूर्ण उपलब्धि हासिल गर्न सकिने समेत आफ्नो धारणा सार्वजनिक गरेका छन् ।

 

सोही अभियानमार्फत विश्वको नेतृत्व एसियाको पोल्टामा ल्याउन सकिने उनको भनाई छ । उनले थप अगाडि लेखेका छन्,’राजकीय अधिकारको दुरुपयोग गरेर चरम भ्रष्टाचार, गुटबन्दीमा रमाइरहेका तथाकथित नेताहरूबाट देशभक्त नेपालीले न्याय, सम्मान र सुरक्षा पाउन संभव छैन ।’

 

यसैबीच, केहीदिन पहिले अध्यक्ष पौडेलको ईमेल, फेसबुक र मोबाइलसमेत ह्याक गर्न कोशिस भएको थियो । जसको ग्रेटर नेपाल राष्ट्रवादी मोर्चाका अध्यक्ष फणीन्द्र नेपालले विरोध गर्दै विज्ञप्तिमार्फत विरोध जनाएका थिए ।

 

ग्रेटर नेपालका अभियन्ता तथा प्राध्यापक नेपालले नेपाल-इन्डो प्यासिफिक स्ट्राटेजिक अलाइन्समा नेपाल रहनुलाई चीन विरोधी गतिविधिलाई साथ दिनु हो भन्दै आपत्ति प्रकट गरे । उनले भने, ‘यो चीनलाई जिस्क्याउनु र रिस उठाउनु सरह हो । चीनलाई कमजोर र अस्थिर बनाउन अमेरिकी योजनाअनुसार यो रणनीति अख्तियार गरिएको हो ।’