शिक्षकबाटै दुई बालिका बलात्कृत, डर–त्रास देखाउँदै पटक–पटक बलात्कार
शिक्षकको काम बालबालिकालाई नैतिक शिक्षा दिने, सहि बाटो देखाई दिने र बाटो बिराउन लागेकालाई सही बाटोमा ल्याउने हो । तर, काभ्रेका एक शिक्षकले भने आफै बाटो बिराएर शिक्षण पेसालाई नै कलङ्कित बनाएका छन् ।
नैतिक शिक्षा दिने एक ती शिक्षकबाट दुई जना अवोध बालिका बलात्कारको शिकार बनेका छन् । कक्षा ५ मा अध्ययनरत ९ वर्षीया दुई छात्रालाई एक वर्षदेखि बलात्कार गरेको आरोपमा जिल्ला प्रहरी कार्यालयले शिक्षक शंकर पहरीलाई पक्राउ गरेको हो ।
पीडितको जाहेरीका आधारमा शिक्षक पहरीलाई पक्राउ गरी थप अनुसन्धान शुरू गरिएको जिल्ला प्रहरी कार्यालय काभ्रेका रविराज खड्काले जानकारी दिए । अनुसन्धानका लागि जिल्ला अदालतबाट ७ दिनको म्याद थप गराइएको छ ।
‘पीडितहरुको जाहेरीका आधारमा अनुसन्धान गरी हामीले थप प्रक्रिया अगाडि बढाएका छौं,’ प्रहरी प्रमुख खड्काले भने, ‘९ वर्षका २ जना बालिकालाई करणी र दुर्व्यवहार गर्ने शिक्षक पहरीलाई अदालतबाट ७ दिनको म्याद थपिएको छ ।’
जाहेरीमा शिक्षक पहरीले केही महिनादेखि खाजा खाने समय, स्कुलबाट छुटेर घर जाने समयमा उनीहरुलाई पटकपटक बलात्कार गर्ने गरेको आरोप लगाइएको छ । शिक्षकले दुईमध्ये एक बालिकालाई कक्षा ४ देखि नै संवेदनशील अङ्ग चलाउने, छुने जस्ता क्रियाकलप गर्दै आएको आरोप छ ।
कक्षा ५ सुरु भएपछि पहिले दुव्र्यवहारमा परेकी बालिकाको साथीलाई समेत उनले दुव्र्यवहार गर्न थालेको उनका अभिभावकहरुले बताएका छन् । बालिकाहरुलाई शिक्षकले केहिले चक्लेट किन्दिन्छु भन्ने, कहिले अरुलाई भनिस् भने कुट्छु, भन्दै डरधम्की देखाउने गरेको आरोप आफन्तको छ ।
