दुई मोटरसाइकल र ट्रक ठोक्किदा एक जनाको मृत्यु
पूर्व-पश्चिम राजमार्ग खण्डको लम्कीचुहा नगरपालिका ४ बलियामा दुई मोटरसाइकल र ट्रक ठोक्किदा एक जनाको मृत्यु भएको छ ।
लम्कीचुहा नगरपालिका २ बहनियाका ५० वर्षका भागीराम चौधरीको मृत्यु भएको प्रहरीले जनाएको छ ।
से ४ प ७३७० र से ६ प ७०४१ नम्बरको मोटरसाइकल एकआपसमा ठोक्किएपछि मृतक चौधरी चढेको मोटरसाइकल उछिटि्टएर ट्रकमुनि छिरेको प्रहरीले जनाएको छ । मोटरसाइकल दुर्घटना हुँदा नजिकै आइपुगेको ना ४ ख १२७४ नम्बरको ट्रकको मुनि परेका चौधरीको घटनास्थलमा नै मृत्यु भएको हो ।
मोटरसाइकल जुध्दा घाइते भएका अन्य दुई जनाको लम्कीस्थित लालरत्न अस्पतालमा उपचार भइरहेको प्रहरीले जनाएको छ । उनीहरुको अवस्था भने सामान्य नै रहेको छ ।
घटना पछि ट्रक र चालक गर्पु थारु प्रहरी नियन्त्रणमा रहेको इलाका प्रहरी कार्यालय लम्कीका प्रमुख प्रहरी निरीक्षक सुरेन्द्रप्रसाद जोशीले जानकारी दिए । मृतक चौधरीको शवलाई पोष्टमार्टमका लागि टीकापुर अस्पतालमा राखिएको छ ।
