पारिवारिक तनावमा नायिका निरुता सिंह
कुनै समय नेपाली चलचित्र क्षेत्रमा एकछत्रजसो राज गरेकी नायिका निरुता सिंह अहिले पारिवारिक तनावमा छिन् ।
अहिले उनी विरामी बाबुको उपचारका लागि मुम्वइमा छिन् । उनले मुम्बइबाटै भनेकी छन्, ‘मेरा लागि अहिले बुबा प्राथमिकतामा हुनुहुन्छ, यसैले कुनै फिल्ममा तत्काल काम गर्दिन ।’ उनले बुबालाई कस्तो विरामीको उपचार गराइरहेकी छन् भन्ने चाँहि खुलाएकी छैनन् ।
उनले काम गर्ने पक्का भएको एक चलचित्रबाट हात झिकेकी छिन् । उज्ज्वल घिमिरेको निर्देशनमा अहिले दार्जिलिङ्गमा छायांकन भइरहेको चलचित्र ‘लभ स्टेशन’ बाट निरुताले हात झिकेकी हुन् ।
गोविन्द शाहीको निर्माणमा गत शुक्रबारदेखि यो चलचित्रको छायांकन शुरु भएको छ । ५० दिनको सेड्यूलसहित यसको निर्माणपक्ष भारत लागेको हो । नायिका निरुता सिंह र नायक उत्तम प्रधानको जोडीलाई फेरि एक पटक पर्दामा ल्याउने तयारी निर्देशक घिमिरेको थियो ।
तर, निरुताले भने अन्तिम समयमा आएर चलचित्रमा काम नगर्ने जानकारी दिएकी हुन् । निरुताले भनिन्, ‘मलाई लभ स्टेशनमा काम गर्न खुबै मन थियो । तर, बुबाको उपचारका कारण समय दिन सकिनँ ।’
निरुताले मंसिर १ गतेबाट छायांकनमा जान लागेको चलचित्र ‘दाल भात तरकारी’ मा भने काम गदैछिन् । चलचित्र ‘नाई नभन्नु ल ५’ मा काम गरेपछि निरुताको डिमाण्ड चरित्र अभिनेत्रीमा खुबै बढेको छ । यो चलचित्रमा प्रदिप खड्का र जसिता गुरुङको मुख्य भूमिका छ ।
