भारतमा पेट्रोलको भाउ ह्वातै बढ्यो, नेपालका उपभोक्तामा थपियो चिन्ता
भारतमा पेट्रोलको भाउ ह्वातै बढेको छ । भारतीयले अब एक लिटर पेट्राल किन्न ९१ भारु खर्च गर्नुपर्ने भएको छ ।
भारतको वित्तीय राजधानी मुम्बइमा पेट्रोलको भाउ बढेर लिटरको ९१ भारु पुगेको फाइनान्सियल एक्सप्रेसले जनाएको छ । भारतमा पेट्रोलको भाउ बढेपछि नेपालमा समेत यसको असर देखिएको छ । पेट्रोलका लागि भारतको भर पर्नुपर्ने नेपालका उपभोक्ता यसको असर नेपालमा पनि देखिने हो कि भन्ने चिन्तामा परेका छन् ।
भारतमा दैनिक पेट्रोलियमको भाउ बढ्दै गएको छ । पेट्रोलको भाउ राजधानी दिल्लीमा ८३.४९, कोलकतामा ८५.३० र चेन्नाइमा ८६.८० पुगेको छ । यस्तै आइतबार डिजेलको भाउ बढेर दिल्लीमा ७४.७९, कोलकतामा ७६.७४, मुम्बइमा ७९.४० र चेन्नाइमा ७९ भारु पुगेको छ । अन्तर्राष्ट्रिय बजारमा पेट्रोलियमको भाउ बढेर व्यारेलको ८३ डलर पुगेको छ ।
भारतमा दिनहु पेट्रोलियम पदार्थको भाउ बढेकाले यसको असर नेपाली बजारमा पनि पर्ने देखिएको छ । नेपाल आयल निगम लिमिटेडले इण्डिन आयल कर्पोरेशन लिमिटेडबाट पेट्रोलियम खरिद गर्दै आएको छ । भारतमा महंगो भएपछि नेपाली पनि थप भाउ बढ्ने छ । असोजमा मात्रै २ पटक पेट्रोलियमको भाउ बढेको छ ।
नेपाल आयल निगमले प्रत्येक महिनाको १ र १६ तारिखमा पेट्रोलियमको मूल्य समायोजन गर्दै आएको छ । पेट्रोलियम पदार्थ महंगिदा ढुवानी लागतमा वृद्धि भई यसको असर बजार भाउमा पर्ने छ । नेपालमा पेट्रोलको भाउ प्रतिलिटर ११४ र डिजेलको १०१ रुपैयाँ छ ।
यता विश्लेषकहरुले कच्चा तेलको भाउ बढेर व्यारेलको १०० डलर पुग्ने अनुमान गरेका छन् । अमेरिकी डलर मजवुत भएपछि अन्तर्राष्ट्रिय बजारमा पेट्रोलियमको भाउ उकालो लाग्दै आएको छ । सन २०१४ मा पेट्रोलियमको भाउ बढेर व्यारेलको १०० डलर पुगेको थियो ।
