२० वर्षे गाडी कडा निगरानीमा, यात्रुवाहकले सामान बोक्न नपाउने

 

 

सरकारले २०७३ चैतबाट देशैभर २० वर्षे गाडी हटाउने निर्णय गरे पनि उपत्यकाबाट यस्ता गाडी विस्थापित हुन सकेका छैनन् । यातायात व्यवस्था विभाग, ट्राफिक प्रहरी र व्यवसायी तीनै पक्ष यस विषयमा जिम्मेवार नबन्दा यस्ता गाडीमा असुरक्षित यात्रा गर्न यात्रु बाध्य छन् ।

दसैंको समयमा यात्रुको चाप बढी रहने र २० वर्ष नपुगेका गाडीले यात्रुको चाप धान्न नसक्ने हुँदा यस्ता पुराना गाडी पनि सञ्चालन हुने गर्छन् । सरकारको उक्त निर्णयपछि महानगरीय ट्राफिक प्रहरी महाशाखासहित देशभरका जिल्ला ट्राफिक प्रहरी कार्यालयहरुले बेलाबेलामा जेकजाँच गरी जरिवाना गरेर छोड्ने गरेका कारण यस्ता गाडी सञ्चालनमा व्यवसायीको मनोमानी छ ।

उपत्यकाका तीन जिल्लामध्ये भक्तपुर र ललितपुरका ग्रामीण इलाकाबाट दैनिक काठमाडौं आवत–जावत गर्ने मिनिबस, मारुती ट्याक्सी २० वर्ष पुराना भए पनि यस्ता गाडीमा ट्राफिक प्रहरीको आँखा पुग्न सकेको छैन ।

पुरानो चेसिस र बडीका कारण यात्रु र सडक सुरक्षाका हिसाबले मात्र होइन, पुरानो इन्जिन, कार्बुरेटर आदि पुर्जाका कारण सहरको वातावरणीय स्वच्छतामा प्रतिकूल असर पार्ने गरेका छन् ।

“दसैंको समयमा यस्ता गाडीले निम्त्याउन सक्ने दुर्घटना र यसको रोकथामका लागि मातहतका तहमा निर्देशन गरिसकेका छौं,” महानगरीय ट्राफिक प्रहरी महाशाखाका एसएसपी वसन्त पन्तले भने, “यी सबै समस्या समाधानका लागि २० वर्ष पुराना गाडीमाथि हामीले कडा निगरानी राखेका छौं । अटेर गरी चलाए गाडी नै नियन्त्रणमा लिन्छौं ।”

यात्रुवाहकलाई सामान ढुवानी नगर्न निर्देशन
भाडाको लोभले यात्रुवाहक गाडीहरु बस, माइक्रो, सुमो आदिमा विभिन्न सामग्री लोड नगर्न महाशाखाले यातायात व्यवसायीहरुलाई निर्देशन दिएको छ । दसैंको बेलामा यात्रुहरु आफैंमा हतारमा हुनाले सामान ढुवानीका लागि मालवाहक गाडी नखोजी यात्रुवाहकमा नै सामान ढुवानी गराउने परिपाटी बढेको निष्कर्ष महाशाखाको छ ।

“एकातिर यात्रु हतारमा हुने र यसैको मौकामा व्यवसायीले पनि बढी भाडाको लोभ गर्दा यात्रुवाहक गाडीमा सामान ढुवानी हुने गरेको हो,” एसएसपी पन्तले भने, “चालक, सहचालकलाई यसरी सामान ढुवानी नगराउन हामीले प्रालि र समिति दुवैका व्यवसायीलाई निर्देशन गराइसकेका छौं । अटेर गरी सामान ढुवानी गरे कोटेश्वर, नयाँबसपार्क, बालाजु, कलंकी, नागढुङ्गा र ललितपुरमा सादा पोशाकमा समेत खटिएका ट्राफिक प्रहरीले कारबाही गर्नेछन् ।”

आउँदो दसैंमा उपत्यकाबाट करिब ३० लाख यात्रु बाहिरिने आकलन महाशाखाको छ । गतवर्षको दसैंमा उपत्यकाबाट दैनिक ८ हजार यात्रु बाहिरिने र ७ हजार यात्रु भित्रिने गरेको महाशाखाको तथ्यांकले देखाएको छ । “यसवर्षको दसैंमा पनि करिब यही बराबरको संख्यामा यात्रुको आवत जावत हुने हाम्रो आकलन छ,” एसएसपी पन्तले बताए ।