अमेरिकी नयाँ रणनीति : चिनियाँ बहुराष्ट्रिय कम्पनी हुवावेलाई रोक्ने तयारी
विश्व अर्थतन्त्रमा उदाउँदो एसियाली मुलुक चीनसँग संयुक्तराज्य अमेरिका कतिसम्म त्रसित भइरहेको छ भन्ने पछिल्लो उनको कदमले पुष्टि गर्छ ।
चीनको बढ्दो आर्थिक दबदबालाई नियन्त्रण गर्न अमेरिकाले नयाँ–नयाँ रणनीति र प्रस्तावहरु ल्याइरहेको छ । अमेरिकाले हालैमात्र चिनियाँ उत्पादन सामग्रीमाथि २०० अर्ब डलर कर बढाएका थिए ।
यस्तै, पछिल्लो दिनमा अमेरिका र प्रशान्त महासागरीय देशहरुको गठबन्धनले पपुवा न्यू गिनी ‘पिएनजी’मा सञ्चार सञ्जाल निर्माण गर्नबाट चिनियाँ बहुराष्ट्रिय कम्पनी हुवावेलाई रोक्ने तयारी गरेको छ ।
यो कुरा अस्ट्रेलियास्थित अमेरिकी कुटनीतिज्ञहरुले पुष्टि गरेका छन् । प्रशान्त क्षेत्रमा बढ्दो चिनिया प्रभावलाई नियन्त्रण गर्न यस्तो कदम चाल्नु परेको उनीहरुको भनाइ छ ।
पिएनजीको इन्टरनेट पूर्वाधार निर्माणमा चिनिया कम्पनी हुवावे मुख्य प्रतिस्पर्धी मानिन्छ । तर अमेरिका, अस्ट्रेलिया र जापानबीच उक्त पूर्वाधार आफैं निर्माण गर्नेगरी छलफल सुरु भएको छ ।
‘हामीले हुवावेको विकल्पमा पिएनजीलाई आकर्षक प्रस्ताव दिएका छौँ,’ अस्ट्रेलियाका लागि अमेरिकी कार्यबाहक राजदूत जेम्स कारुसोले भने, ‘तर अन्तिम निर्णय गर्ने अधिकार पिएनजी सरकारको हातमा छ ।’
गत अगस्टमा मात्र मुलुकको सुरक्षासँग जोडिएको संवेदनशील सञ्चार क्षेत्रमा विदेशी कम्पनीलाई जिम्मेवारी दिन नहुने कारण देखाउँदै अस्ट्रेलियामा हुवावेलाई फाइभ–जी मोबाइल नेटवर्क बिछ्याउन रोकिएको थियो ।
अस्ट्रेलियाले यसै वर्ष सोलोमोन आइल्यान्डमा समुद्रमुनि इन्टरनेट केबल बिछ्याउने एक परियोजनाबाट हुवावेलाई अलग्याउन भूमिका खेलेको थियो । उक्त परियोजनाका लागि आवश्यक रकम जुटाउन अस्ट्रेलिया स्वयंले सहयोग गरेको थियो ।
यो केबल सञ्जालले पिएनजीलाई पनि जोड्ने छ । हुवावेले सुरक्षा खतरा रहेको तथा चिनियाँ सरकारी गुप्तचर निकायसँग सम्पर्क रहेको भन्ने आरोपहरुको लगातार खण्डन गरिआएको छ ।
बेइजिङले प्रशान्त महासागरका राना द्वीपीय राष्ट्रहरुमा पूर्वाधार निर्माणका लागि न्यून ब्याजदरमा अर्बौं डलर ऋण प्रवाह गरिरहेको छ । यी राष्ट्रहरु चीनसमेत एसियाका धेरै मुलुकका लागि समुद्रसम्मको पहुँचका लागि महत्वपूर्ण रहिआएका छन् ।
अस्ट्रेलियाले बेइजिङको उक्त कदमको जवाफमा प्रशान्त महासागरीय मुलुकहरुलाई दिइने सहायता रकम बढाउनुका साथै क्षेत्रीय सुरक्षा सम्झौतालाई सुदृढ गरिरहेको छ ।
कारुसोले अमेरिका र यसका साझेदार मुलुकहरुसँग व्यवसायका लागि प्रशान्त क्षेत्रीय मुलुकहरुलाई सहज वातावरण निर्माण गर्नु पनि आवश्यक रहेको बताएका छन् । उनले भने, ‘यसको मुख्य कुरा नै विकल्प दिनु हो, चीनसँग व्यवसाय नै गर्न हुँदैन भनेर रोक्न सकिन्न ।’
