७३औँ राष्ट्रसंघीय महासभामा सहभागी हुन प्रधानमन्त्री न्युयोर्क प्रस्थान



 

११ असोजमा सम्बोधन :

प्रधानमन्त्री केपी शर्मा ओली संयुक्त राष्ट्रसंघको ७३औँ महासभामा सहभागी हुन शनिबार न्युयोर्क प्रस्थान गरेका छन् । पराष्ट्रमन्त्री प्रदीप ज्ञवाली, प्रमुख सल्लाहकार विष्णु रिमालसहित करिब दुई दर्जन प्रतिनिधिमण्डलका साथमा प्रधानमन्त्री न्युयोर्क गएका हुन् । प्रधानमन्त्रीले राष्ट्रसंघको ७३औँ महासभालाई ११ असोजमा सम्बोधन गर्नेछन् ।

 

प्रधानमन्त्री ओलीले भारतीय विदेशमन्त्री सुष्मा स्वराज र पाकिस्तानी विदेशमन्त्री शाह मुहम्मद कुरेसीसँग बेग्लाबेग्लै हुने भेटमा सार्कको शिखर सम्मेलनमा जोड दिने तयारीसमेत गरेका छन् ।

 

संयुक्त राष्ट्रसंघले तयार गरेको कार्यक्रमअनुसार प्रधानमन्त्री ओलीले ११ असोज अपराह्न दोस्रो सत्रको दसौँ वक्ताका रूपमा सम्बोधन गर्ने कार्यक्रम छ । महासभामा भारत र पाकिस्तानले विदेशमन्त्रीको मात्रै प्रतिनिधित्व गराएका छन् ।

 

भारतका तर्फबाट विदेशमन्त्री सुष्मा स्वराजले १३ असोजमा पहिलो सत्रको पाँचौँ वक्ताका रूपमा सम्बोधन गर्ने छिन् । तीन तहको निर्वाचन सम्पन्न भएपछि गठन भएको स्थिर सरकारका प्रधानमन्त्रीका रुपमा ओलीले महासभालाई सम्बोधन गर्नेछन् । उनले नेपालको शान्ति प्रक्रिया, संविधान निर्माण प्रक्रियाको सफलताका बारेमा सम्बोधन गर्ने तयारी भएको कूटनीतिक स्रोतहरुले बताएका छन् ।

 

प्रधानमन्त्री ओलीले महासभामा नेपालको शान्तिप्रक्रियालाई अन्तर्राष्ट्रिय रूपमा ‘ब्रान्डिङ’ गर्न प्रस्ताव गर्ने बुझिएको छ । नेपालको सफल शान्तिप्रक्रिया विश्वका लागि उदाहरणीय रहेको र यसको सफल अनुभव अन्य देशका लागि पनि अनुकरणीय हुने सरकारको बुझाइ छ ।

 

प्रधानमन्त्री राष्ट्रसंघीय अन्य उच्चस्तरीय बैठकमा सहभागी हुँदा पनि यो विषय अघि सार्ने गरी परराष्ट्र मन्त्रालयले तयारी गरिरहेको छ । पराष्टमन्त्रालयको चालु आर्थिक बर्षको बार्षिक कार्ययोजनामा पनि शान्तिप्रक्रियालाई अन्तर्राष्ट्रिय रुपमा स्थापित गराउन कूटनीतिक प्रयास गर्ने उल्लेख छ ।

 

न्युयोर्कमा प्रधानमन्त्रीको कार्यतालिका
प्रधानमन्त्री ओली अमेरिकी समयअनुसार आइतवार विहान न्युयोर्क अवतरण हुनेछन् । उनको व्यस्तता सोमवारदेखि शुरु हुनेछ । सोमवार विहान नेल्सन मण्डेला पिस समिटलाई सम्बोधन गर्ने कार्यक्रम छ । सोमबारै अपरान्ह न्युयोर्कस्थित नेपाली स्थायी नियोग र महावाणिज्य दुताबास कार्यालय भ्रमण गर्नेछन् ।

 

लगत्तै दक्षिण अफ्रिकी प्रतिनिधिमण्डलद्वारा स्वर्गीय नेल्सन मण्डेलाको सम्मानमा आयोजित रिसेप्सनमा सहभागी हुनेछन् ।

 

सोमवार साँझ अमेरिकी राष्टपति डोनाल्ड टम्पले आयोजना गर्ने रात्रीभोजमा सहभागी हुनेछन् । मंगलवार राष्टसंघीय महासचिवले आयोजन गर्ने रिसेप्सनमा सहभागी भएर प्रधानमन्त्री ओली त्यही दिन महासचिवद्वारा आयोजित दिवाभोजमा पनि सहभागी हुनेछन् ।

 

मंगलबार नै एक्सन फर पिसकिपिंगसम्बन्धी उच्चस्तरीय वैठकमा सहभागी भएर प्रधानमन्त्रीले एशिया सोसाइटीद्वारा आयोजित शान्ति, लोकतन्त्र र विकासका बिषयमा सम्बोधन गर्ने कार्यक्रम छ ।

 

बुधवार प्रधानमन्त्री ओलीले स्वीटजरल्याण्डका राष्टपति एलेन बर्सेटसँग भेटवार्ता गर्ने कार्यक्रम छ । बुधवार नै भियतनामको राष्ट्रिय दिवसका अबसरमा आयोजित कार्यक्रममा सहभागी हुनेछन् ।

 

विहीवार महासभालाई सम्बोधन गर्ने कार्यक्रम छ । विहीवार नै राष्ट्रसंघीय महासचिव अन्टोनियो गुटेर्रससँग द्विपक्षीय वार्ता हुनेछ । शुक्रवार कम्बोडियाका प्रधानमन्त्रीसँग भेटवार्ता गर्नेछन् भने शनिबार कोस्टारिका प्रस्थान गर्ने र त्यहाँ उच्चस्तरीय भेटवार्ता गर्ने कार्यक्रम छ ।

 

सार्क व्युँताउन नेपालको प्रयास
नेपालले दक्षिण एसियाली क्षेत्रीय सहयोग संगठन (सार्क) को १९औँ शिखर सम्मेलनका लागि कूटनीतिक प्रयास थालेको छ । न्युयोर्कमा ११ असोजमा बस्ने सार्क परराष्ट्रमन्त्रीहरूको अनौपचारिक बैठकमा नेपालले भारतीय र पाकिस्तानलाई एकैसाथ राखेर सहमतिका लागि आग्रह गर्ने भएको हो । बैठकको अध्यक्षता परराष्ट्रमन्त्री प्रदीप ज्ञवालीले गर्ने तय भएको छ । अमेरिकी समयअनुसार दिउँसो १ बजेदेखि ३ बजेसम्म दिवाभोजसहितको अनौपचारिक वैठक हुनेछ ।

 

त्यसअघि ज्ञवालीले भारत र पाकिस्तानका विदेशमन्त्रीसँग बेग्लाबेग्लै छलफल गर्ने समय तय भएको छ । परराष्टमन्त्री प्रदीप ज्ञवाली र भारतीय विदेशमन्त्री सुष्मा स्वराजबीच सोमवार अमेरिकी समयअनुसार ११ बजे साइडलाइन वार्ता तय भएको छ ।

 

भारतद्वारा आयोजित बिमस्टेक सदस्य मुलुकका सैनिकहरुको संयुक्त अभ्यासमा नेपाली सेनाको फौज सहभागी नभएको प्रकरणपछि नेपाल र भारतका उच्च अधिकारीको पहिलो भेट हुन लागेको हो ।

 

पाकिस्तानका विदेशमन्त्री शाह मुहम्मद कुरेसीले मंगलवार १२ बजे नेपाली समकक्षी ज्ञवालीसँग भेटवार्ता गर्नेछन् । दुवै विदेशमन्त्रीसँगको भेट २० मिनेटका लागि तय भएको छ ।

 

नेपालले १४ र १५ भदौमा बहुक्षेत्रीय सहकार्यका लागि बंगालको खाडी प्रयास (बिमस्टेक) सम्मेलन सम्पन्न गरेर श्रीलंकालाई अध्यक्षता हस्तान्तरण गरेपछि सार्क सम्मेलनका लागि प्रयास थाल्न लागेको हो । गत वर्ष परराष्ट्रमन्त्री कृष्णबहादुर महराले परराष्ट्रमन्त्रीस्तरीय अनौपचारिक बैठकको अध्यक्षता गरेका थिए ।

 

३ र ४ चैत ०७२ मा पोखरामा बसेको सार्क मन्त्रिपरिषद् (परराष्ट्रमन्त्रीस्तरीय) बैठकले १९औँ शिखर सम्मेलन २४ र २५ कात्तिक ०७३ मा पाकिस्तानको इस्लामाबादमा गर्ने निर्णय गरेको थियो ।

प्रतिक्रिया दिनुहोस
शर्मिला वाइबालाई चार दिन हिरासतमा राख्न अनुमति

    आफूलाई अभियन्ता बताउँदै व्यक्तिगत विषयहरुमा सामाजिक सञ्जालमार्फत टिप्पणी गर्ने शर्मिला वाइबालाई

सरकारको आफ्नै काम कारबाहीप्रति प्रधानमन्त्रीको असन्तुष्टि

    अर्थमन्त्री डा.प्रकाशशरण महतसँगको खटपटको चर्चाबीच प्रधानमन्त्री पुष्पकमल दाहाल प्रचण्डले आफैँले किटान

दूधको भुक्तानी दे, किसान मार्न पाइँदैन भन्दै कृषिमन्त्रीको राजीनामा माग

    किसानहरूले लुम्बिनी प्रदेशका विभिन्न जिल्लामा कृषिमन्त्रीको राजीनामा मागसहित चक्काजाम गरेका छन्

परिस्थिति जटिल र चुनौतीपूर्ण छ : प्रधानमन्त्री प्रचण्ड

  प्रधानमन्त्री पुष्पकमल दाहाल प्रचण्डले आफू नेतृत्वको सरकारले लक्ष्य अनुसार परिणाम दिन नसकेको